October 28, 2022; Sawrkar lehkha lem, Cyclone Sitrang avanga sawrkar pisa zawng zawng chawlhna tur thupek, Aizawl DC hming ziah hnan anga sawrkar thupek lem siamtu chu police ten manin, anticipatory bail a chhuah a ni.

Hemi chungchangah hian vawiin khan Mizoram police chuan thuchhuah siamin, ni 25. 10. 2022 khan sawrkar lehkha lem, Cyclone Sitrang avanga sawrkar pisa zawng zawng kharna tur thupek, Aizawl DC hming ziah hnan anga (forged signature) siam chu WhatsApp ah nasa taka thehdarh a ni tih tarlangin, he sawrkar thupek lem/phuah chawp avang hian mi tam takin hemi ni hian office khar a ni dawn em tiin mipui nunphung nasa takin a buai phah tih an tarlang.

Hemi chungchangah hian Isaac C. Lalrempuia, Sub-Divisional Magistrate, Aizawl District chuan Cyber Crime Police Station ah FIR a thehlut a, Cyber Crime PS Case no 105/2022 u/s 468/505 (I) (b) IPC dated 25th October, 2022 ziah luh niin a case hi chhui chhunzawm nghal a ni.

Ngun taka chhui a nih hnuah he sawrkar lehkha lem hi Lalsangliana, Superintending Engineer (SE), PWD, ITI venga cheng siam a ni tih chhuichhuah niin, amah hi man nghal a ni a, tunah hian anticipatory bail in chhuah a ni.

Mizoram police chuan sawrkar lehkha pawimawh lem siam lo turin leh hetiang thilte thawn darh lo turin mipuite a ngen a, dan anga na taka inhrem theihna a nih avangin leh mi thenkhat pawh an lo chetchhiat fo tawhna a nih avangin hetiang thilah hian inhnamhnawih lo turin mitin te a ngen.