Aizawl July 20, 2024 : Hun engemaw chen Central Young Lai Association ten Myanmar-a bungraw lut tur an dan hnuah Zirtawpni atang khan bungrua thawnluh an remti a, hetih lai hian petrol, diesel leh leitha erawh khauh takin an dan chhunzawm zel.

Lawngtlai Post tarlan danin District Magistrate chuan Lawngtlai District-ah Petrol leh Diesel khuahkhirhna thupek a lo chhuah tawh a, hemi hnu hian Central YLA chuan Myanmar a lut tur bungrua an dan chu thlah dulin, Ningani zan atang khan thawn luh an remti a, mahse duty chhunzawm zel ni se an ti a ni. Myanmar a bungrua thawnluh theih a nih tak vang hian Lawngtlai Bazar ah lirthei, Myanmar a lut tur bungrua load an thahnem hle a, bungrua load leh indawrna kal vel hian khawpui nunphung a tihbuai loh nan veng hruaitute enpuina hnuai ah mumal tak a kalpui niin bungrua chhuakte ngun taka enfiahin chhinchhiah a ni.

Lawngtlai atanga bungrua phurhchhuahte hi Hruitezawl leh Zochachhuah panpui an ni a, Hruitezawl atang hian Chhimtuipui ah lawng hmangin Myanmar ah phurhluh niin, Zochachhuah thlen hma, Zocha Lei (Bridge) bul atangin lawng hmang bawk in Myanmar ah phurhluh a ni.