Aizawl July 6, 2024 : Central Young Lai Association chuan Myanmar lama oil phurhluh chu dan chhunzawm zel an tum a, kar khat hnuah an kal zel dan tur rel leh an tum.

CYLA hian June ni 24,2024 atang khan Rakhine State, Myanmar a dan lova tuialhthei leh eichawp thil thawnluh a remti lo a, tun thlengin an la duty chhunzawm zel. Lawngtlai atanga thudawn danin CYLA ten Siaha filling station te hrek anga sawi chu a dik chiah lo nia sawiin mipui mamawh tawk lirtheite chu an kaltir zel a, a hma angin free taka kal an remti lo mai niin an sawi a. Oil phur lirtheite hi Siaha leh Sangau lam pan lovin Tuipang lamah an phurh fo thin avangin hetiang hian an hrek hrih mai niin an sawi. Thudawn danin Mizoram oil te hi Rakhine (Myanmar) ah phurhluh a ni a, tunlai hi leilet siam hunlai anih avangin Rakhine (Arakan) ho chuan leilet-a khawl hnathawh nan an hmang niin an sawi.

Lawngtlai-a CYLA duty te hi tunhnai khan Adviser to Chief Minister Dr. Lorrain Lalpekliana Chinzah leh Lawngtlai DC Cheemala Siva Gopal Reddy te chuan an tlawh a, an hmalakna chawlhsan turin an ngen a. Central YLA hruaitute chuan ramri a dan lova sumdawnna chu sawrkar in titawp se an duh thu te, Myanmar lam mi ramri kana zalen taka Lawngtlai District a an luhtheih laia kan unau Bangladesh atanga an sahimna zawnga Bawm hnam rawn lutte chunga khauh taka dan lekkawh a ni chu an hriatthiam loh thute, Rakhine mi Lawngtlai District a awmte an ram lamah nawr haw vek an duh thu te an lo thlen a. CYLA thuthlente chu MLA leh DC chuan an hmazawn ve ve ah hmalak nghal an tum thu an sawi.