Aizawl: Central YMA chuan inkharkhip tum 5-na kalpui mekah kan himna atan ruahmanna hrang hrang an siamte bawhzui turin Sub Hqrs, Group, leh Branch YMA te an ngen.

Central YMA chuan thuchhuah siamin tunlai hripui leng mek (Covid 19) avangin khawvelin harsatna kan hmachhawn mek a. Kan ramah ngei pawh Covid 19 hrikai mi 22 lai kan lo nei ve ta reng mai tiin mipuite he hrileng mek lakah fimkhur tur leh a darh zel loh nana hmala turin a ngen a. Inkharkhip tum 5-na kalpui mekah mipuite kan him zawk nan ruahmanna hrang hrang siam a ni a, Sub- Hqrs./Group /Branch YMA-te a remchan dan a bawhzui zel turin an ngen.

Branch hrang hrangin mumal taka inkaihhruaina siama kan kalpui mek, mitthi vuinaah Social Distancing uluk taka kalpuia hmaituamna hman uar ni se, mipui a tlem thei ang ber mitthi vuina hunah hian kal thin ni se an ti a. Hrileng mek a darh zel loh nan, mipuite kan hma zawn theuhah fimkhur a, kan himna atan sawrkar ruahmanna siam te zawm theuh turin an ngen bawk a ni.