ZALEN July 22, 2023 : Central YMA chuan NGO Coordination Committee-in Thawhlehni-a a buatsaih tur chungchangah Mizoram-a Meitei awmte thla bar lo tur leh thlamuang taka awm turin an ngen. Vawiin thlengin nizan atanga Mizoram Police DIG (Northern Range) hmalakna a Meitei awmna zirna In-a duty police ten harsatna an la tawk lo. 

Mizoram sawrkar chuan Meitei zirlai awmna Vety College, Selesih ; Mizoram University, Tanhril ; RIPANS, Zemabawk leh ZMC, Falkawn-ah te ralthuam keng police Zirtawpni (21.7.2023) zan dar 9 atang khan an duty tir tih Mizoram Police DIG (Northern Range) Lallianmawia, IPS chuan ZALEN a hrilh a, tun thlengin duty te hian harsatna an la tawh loh thu a sawi.

CYMA chuan Manipur tualchhung buaina vanga Zo-hnahthlak ten harsatna an tawh mek tuarpuina lantir nan leh an thlavang hauhna hun, NGO Coordination Committee-in 25.07.2023-a a buatsaih tur avangin Mizorama Meitei awmte thla bar lo tur hian an ngen. CYMA chuan Manipur sawrkar pawh Imphal leh a chhehvela Mizo unau khawsa leh zirlaite, an himna tur ngaihtuaha theihtawpa hmala turin a ngen bawk.