Aizawl: Central YMA chuan damdawi in a thisen an pek thin chu tihtawp hrih an rel.

Zalen in Central YMA hruaitute hnen atanga thu a dawn danin Civil Hospital, Aizawl blood bank thawktute chuan lockdown tirh khan thisen an tlakchham thu sawiin Central YMA chu an rawn pur a. OB meeting chuan thisen pe thei an awm leh awm loh te zawt kualin ruahmanna a siam a. Vaivakawn leh Tuikual South Branch ten thisen hi pe hmanin Luangmual, Chanmari leh Electric veng Branch te chu pe leh turin ruahmanna an siam bakah Aizawl khawpui chhung Branch dangah te pawh social distancing nen tangkawpa thisen pe tura ruahmanna an siam mek laiin NSS lam chu thisen pe tur hian an lo be leh daih niin an sawi a.

Hetianga YMA lam be chhunzawm lova midang an lo biak tak daih avang hian pe zel tura ruahmanna an lo siam pawh an titawp ta niin an sawi. Central YMA General Secretary Prof. Lalnuntluanga chuan hetiang hian thuchhuah a siam a ni. "YMA hminga thisen pek chung changah Sub-Hqrs. YMA, Group YMA leh Branch YMA-te chu Central YMA thu ngaichang rih turin kan inhriattir e,"tiin tarlan a ni.

Hetih lai hian Mizoram Blood Transfusion Council thawktute chuan hetiang thil thleng engmah an hriat loh thu leh eng emaw information inpek fuhloh palh anih an rin thu Zalen an hrilh thung.