June 28, 2022; Vawiin khan Silchar mipuiten an tlakchham, tuithianghlim in tur litre 12,276 (cases 1023) chu a thawhhnihna turin Central YMA office atangin phurh chhuah a ni a. Vawiin vek khan Mizoram sawrkar hmalakna in tanker 5 hmangin Silchar ah tui thianghlim phurh luh leh a ni bawk. Hetihlai hian Silchar branch YMA bultumin naktuk nileng hian 'hnatlang runpui' neih a ni dawn.  

Central YMA kaihhruaina hnuaia Silchar mipuite tui thianghlim pek tur thawh 2-na atan hian, Aizawl khawpui chhung YMA branch 21 ten tui cases 818 thawhkhawmin, mimal pawl leh kohhran lam atanga cases 205 thawhkhawm nen, avaiin cases 1,023 (litre 12,276) a ni.

Tui thawhkhawm a nih bakah hian YMA branch thenkhat, tui thawhkhawm remchang lo Branch 14 te atangin pawisa fai Rs. 50,300/- thawhkhawm a ni bawk a. Mimal, pawl leh kohhran lam atangin pawisa fai Rs. 52,200/- a dawng bawk a ni. Heng pawisa fai te hi Silchar branch YMA hnenah hlan tura ruahman a ni. 

Mizoram sawrkar hmalakna in vawiin vek khan tanker 5 hmangin, Silchar ah tui thianghlim phurh luh chhunzawm leh a ni bawk a, an tui phurh hi a vaiin 24kl a ni. Lailapur PS atangin police in Sonai Circle Office thleng an escort ang a. Sonai Circle office lamin tui mamawh na hmun ah an sem pui ve leh thung dawn a ni.

Hetihlai hian Silchar branch YMA bultumin, naktuk nileng hian Silcharah hnatlang runpui neih a ni dawn tih Sichar Branch YMA president K Vanlalhriata chuan ZALEN a hrilh a, hnatlang an neih turah, naupang leh hmeichhia thlenga thawhchhuah an tum tih sawiin, Mizote nen a inhne hnai hnamdangte pawhin hnatlangah hian tel ve an tum tih a sawi.

Silchar Branch YMA hruaitute leh member thenkhatte chu mi mangang leh tanpui ngaite tanpuiin ni 8 chhung zet an thawkchhuak tawh a, hemi chungchangah hian Silchar branch YMA president chuan, an taksa chau ve deuh mahse, midangte tanpui thei a an awm chu an lawm tih a sawi.

Naktuk hnatlang pui an neih tura an tum ber tur chu mamawhtute hnena tui thianghlim sem a ni tih sawiin Silchar branch YMA president chuan, tui cases 250-300 tal sem zawh an tum tur thu a sawi a, hemi bak mamawh dang pawh a tul ang zel a sem thei tura an inruahman thu a sawi.

June 28, 2022 thleng a Silchar tuilian tuarte tanpuina tur a Mizoram sawrkar leh Mizo mipuite luan chhuahna (hriat theih chin.)

• Central YMA chuan Aizawla YMA branch hrang hrangte bakah, pawl leh mimal thahnemngaite thawh khawm tui thianghlim litre 15,000 chu June 26, Pathianni khan an thawn thla a, vawiin ah a thawh hnih nan YMA branch, mimal/pawl leh kohhran hrang hrangte thawh khawm litre 12,276 leh pawisa fai an thawn thla chunzawm leh.
• June ni 27 khan Mizoram sawrkar a DM&R hmalaknain, medium tanker 5 leh HMV tanker 1 bakah 1st IR police tanker lian 1 hmangin Silcharah tui phurh luh a ni. Vawiin June ni 28 ah tanker 5 hmangin Silchar ah tui thianghlim phurh luh chhunzawm leh a ni.
• Aizawl FC chuan an tui phur lirthei pakhat chu Silchar leh a chhehvela mipui tana tui thianghlim chawisak turin an thawh.
• Mizoram Synod chuan Rs. 8,00,000 a pe dawn a,June ni 29, Nilainiah Cachar DC hnenah an hlan ang.
• June 26, Pathianni khan PHE department chuan pick-up pahnih leh 407 truck pakhat hmangin Silchar Mizoram House-ah tui thianghlim an dah.
• YMA, Kolasib Sub-Headquarters chuan Silchar tuilian tuar mekte tanpui nan June ni 27 khan Silchar branch YMA leh Cachar DC hnenah Rs 50,000 ve ve an hlan.
• Mizoram Oil Tanker's Driver's Association chuan June 26, 2022 khan tui thianghlim cases 80 an thawn.