Aizawl: Mizoramah kum 1984 atanga 2019 inkar chhung khan damdawi hman sual vanga thi 1578 an awm a, heng zinga 88.33% hi mipa an ni.

Excise & Narcotics department chhinchhiah danin nikum 2019 chhung khan damdawi hman sual vanga thi hi Mizoramah mi 54 an awm a, an zinga 42 hi mipa niin hmeichhia 12 an awm bawk. Damdawi ti thin ten an thihpui tam ber hi heroin a ni a, heroin vanga thi hi 27 an ni a, a dang pawh hi heroin leh thildang remchang tihpawlh te an ni.

Department chhinchhiah danin kum 1984 atanga nikum kumtawp thleng khan damdawi hmansual vanga thi hi Mizoramah mi 1578 an awm tawh a, heng zinga 1394 hi mipa niin damdawi hmansual vanga thi hmeichhia 184 an awm bawk.

Damdawi ti thinten an thihpui tam ber chu proxyvon/parvon spas a ni a, hemi avanga thi hi mi 1161 an awm nia chhinchhiah a ni a, heroin vanga thi mi 215-ten a dawt a, a dang 202 hi a chi hrang hrang tihpawlh an ni. Kum 2017 atangin proxyvon vanga thi an awm tawh lova, heroin chu drug tithinte thihpui langsar ber a ni.

END hian nikum chhung khan heroin kg 12.596 an man a, ganja kg 370.068, methamphetamine mum 1439964 leh pseudoephedrine kg 90.692 an man a. Rakzu litre 95665, zu bilh lai tin 137733 manin ruihhlo kaihhnawihah hian lirthei 208 an man bawk.

Excise department hian NDPS Act 1985 hnuaiah mihring 1053, MLP Act hnuaiah mi 1332, MLPC Act 2014 ah mi 688, Mizoram Excise Act 1973 hnuaiah mi 146 leh ruihhlo kaihhnawihah ram dang mi 35 an man a ni.