ZALEN July 21, 2025; Thudawn danin, Dampa bialtu MLA Lalrintluanga Sailo (65), Luangmual, Aizawl chu zanin dar 9:10 vel khan Max Super Speciality Hospital, Delhi-ah a thi.

Lalrintluanga Sailo hi khawsik vangin June ni 29, 2025 khan Delhi panpui a ni.

Dampa bialah a zawnin term hnih thlan tlin a ni, MNF sawrkar 2018-2023 ah khan a vawi khat nan thlan tlin niin, 2023 -ah a term hnih nan thlan tlin leh a ni.

Dampa bialtu, Lalrintluanga Sailo hi June 13, 1960 khan piangin kum 2018 khan a bialah hian MLA tang lai, Congress party candidate, Lalrobiaka chu vote 1,657-in a hneh a. Kum 2023 inthlanah khan a bial ngaiah hian ZPM candidate, Vanlalsailova chu vote 292-a hnehin thlan tlin nawn leh a ni.

MNF-ah hian kum 16 mi lek a nih laiin ram hnuaia lut zingah a tel a, kum 1986-a Mizoram Peace Accord ziah a nih khan lo chhuakin an party dintu, Laldenga driver a ni thin. 

Politics khawvelah hian an chenna, Luangmualah village council member-ah vawi li a zawna thlan a ni a. Branch YMA-ah pawh president leh financial secretary a lo ni tawh thin a, Mizoram Football Association (MFA)-ah executive member-ah term hnih a tel bawk.

A nupui, Lalbiakthuami nen fa panga an nei.

#ZalenNews