Aizawl May 29, 2023 : Vawiin khan Convention Centre, Lunglei-ah MNF Sub-Headquarters Lunglei huaihawtin 'Thawktute Infuih tharna leh mi thar lawmluhna' hun an hmang a, he huna thusawitu pakhat Dampa MLA Lalrintluanga Sailo chuan LMC-a an tla khan a beng harh niin a sawi. ZPM Leader Lalduhoma chu Alzheimer natna a neih leh neih loh he huna chanchinbumi te kaltlangin a zawt. 

Lalrintluanga Sailo MLA, Dy. Govt.Chief Whip, Mizoram chuan, LMC-a an tla chu lawmawm a tih thu sawiin, "LMC leh Zemabawk LC by-election kha awm lo se, kumin kum tawp inthlan hian MNF hi kan tla palh mai thei. LMC-a kan tla kha Pathianin min ben harhna a ni a, a lawmawm hle. Social Media-ah ZPM-ten dawta sual tinrengin MNF min hek a, MNF worker-te insawifiah ve lovin kan ngawi mai mai a. Tunah chuan dawt leh sual tinrenga min hekna te chu sawifiah vein, Zoram kan hmangaihna thu thlengin kan tlangaupui ve ta a. Tunah chuan LMC-a kan tlak zawih zawihna bialah kan inlawmlut ruih ruih a ni," a ti. 

He huna hian Dampa MLA chuan ZPM Leader zawhna zawtin, "Arabian sea hleuh kai anga insawi ZPM hotupa Pu Lalduhoma hi Alzheimer natna a nei em ni tih hi vawiina chanchinbu mite kaltlang hian ka zawt a. Nu chhula piangah tumah Arabian sea hleuhkai an la awm lo. Alzheimer a nei lo anih erawh chuan kalphung thar awmze neilo tlangaupui fo a, Super CM candidate nih tum hi rak rak tawh lo turin ka chah nghal a ni," a ti.