Aizawl : Mizoram sawrkarin Dampa Tiger reserve zauhna tur atana a rin luh Serhmun khua ah tun thlengin chhungkaw 27 bawr vel inbengbel (in leh lo la nei) an la awm a, zangnadawm-na chungchangah an lungawilohna High Court ah thlenin, thubuai a awm mek.

ZALEN thudawn danin, Serhmun khua ah hian Mizoram sawrkarin chhungkaw pakhat tan cheng nuai 10 zangnadawmna a pek la duh lo chhungkaw 10, in dang thar te leh relocation fund dawng tur list siam lai a hmaih chhungkaw 4 te nen In (chhungkua) 27 vel an la awm a, khua luahlum tak erawh chhungkaw 14 emaw vel an ni a, chhungkaw dangte erawh hmun danga eizawnga awm, Serhmun khua a in leh lo la nei (permanent address a Serhmun khua la hmang) an ni. 

Serhmun khua ah hian school a awm tawh lo a, Village Council pawh thiah vek tawh niin, YMA erawh tha takin an la kal a, ratailer pawh an la awm a, current lamah anmahni inbuaipuiin harsatna lutuk an tawk lo. Naupang 11 vel an awm a, chung naupangte chuan an khaw thenawm Kawrte, Bunghmun leh Tuidam lamah te zirna an chhunzawm. Serhmun khaw mi tam ber te chu Mamit ah inbengbelin, Mizoram hmun hrang hrang a inbengbel zui ta chhungkaw engemaw zah an awm bawk.

Mamit district chhung a awm, Mizo Pasaltha hmingthang, Taitesena chen thinna leh a thlan awmna, Serhmun khua hi kum 1926 a din niin, Mizoram sawrkarin Dampa Tiger reserve zauhna tur atana a ruahman tirh, kum 2009 ah khan in 238 awmin, mihring 900 bawr vel an cheng thin.