ZALEN March 3, 2025; Mizoram sawrkarin Myanmar kuhva rah dan lo a phurh tihtawp tumin theihtawp a chhuah reng a, tun dinhmunah a la tawp hmak rih lo.

Assembly budget session neih meka member te zawhna a chhan danin, home minister chuan Mizoram sawrkar in Myanmar kuhva rah dan lo a phurh titawp turin hma a la reng tih a tarlang. 

Sawrkar hmalakna home minister tarlan dan :

1. Mizoram hmun hrang hrangah dan lo a kuhva phur ten kawng ruk an neihte chhui a ni a, heng kawnga kal te lo dan chah theihna turin check gate hmun hrang hrangah dah a ni.

2. Kuhva man a piangte leh a neitute laka dan anga hmalak a nih theih nan Custom Preventive Force-ah hlan zel an ni.

3. District Magistrate ten an huam chhungah dan lova kuhva tawlh a awm lohna turin prohibitory order an chhuah bawk.

4. International boundary vengtu central force te nen tangrualin kuhva tawlhruk theihna te uluk taka ven reng a ni.

Home minister chuan dan lo a kuhva tawlhruk te hi man tur an la awm tih tarlang bawkin, Mizoram police ten kum 2024-2025 chhunga kuhva an man (seize) zat chu bag 18,130 (12,79,628 kg) a ni a. Rs. 23,99,46,750/- man hu vel a ni tih a tarlang bawk.