ZALEN August 18, 2025 : Vawiin chawhma dar 10:30 khan NESO huaihawtin, MZP General Headquarters chuan, hmarchhaka dan lova lo lut duh loh entirnan Vanapa Hall kawt-ah "Sit-in Protest against illegal immigration in North East States" a nei a, he huna thusawitu MZP President H. Lalthianghlima chuan sawrkarin ruahmanna khauh tak siam se la, ramri ven uluk a ngai hle a ti. 

MZP President chuan H. Lalthianghlima, "India hmarchhak state-ah hian dan loa raltlan Bangladeshi an tam em em a, hei hian state tin a tibuai mek a. Kan state thenawm Assam phei chu an buai hle tawh a ni. Chuvangin, keini Mizoram pawh kan harh a tul a. Assam atanga illegal immigrant an hnawhchuah te hian Mizoram bak pan tur an nei lo. Kan sawrkar pawhin ruahmanna khauh tak siam se la. Ramri hi kan ven uluk a ngai hle a ni" a ti. 

MZP President chuan, NESO in illegal immigrant a dona kawngah MZP in a thlawp zel tur thu a sawi a. Mizo mipuite pawhin thlawp turin a ngen nghal. 

NESO Vice Chairman Ricky Lalbiakmawia, MZP represent pawhin thu sawiin, "India hmarchhak state-ah Bangladesh atanga dan loa rawn pem lut an tam lutuk chu NESO in a vei em em a. Chimrala kan awm loh nan theih ang angin hma a la mek a ni. Kum tam tak kal ta atangin Hmarchhak bial te hian dan lova lo pem lutte thununna leh umzuina tha tak a neih loh avangin harsatna a lo tawk nasa tawh a ni, kum 1947-a India in Independence a hmuh hnu lawk atangin he buaina hi a intan tawh a, hei hian State tinte khawtlang nun leh hnam zia rang te, dan lova pem lutte avanga harsatna leh Politics thila ngialnghehna tichhetu berah a tang ta a ni," a ti.

Tripura State chu entirna ah hmangin tun dinhmunah chuan a ram leilung fate chu ram neitu nichungin hnam tlem zawk an ni ta a, Assam pawhin 1985-a Assam Accord ziah hnan nimah sela, mimal thahnem ngaiten bei viau mah se, hlawhtlinna an la hmu thei chuang lo a ti a, he harsatna vek hi Meghalaya pawhin an tawh thu a tarlang bawk.

North East Students Organisation (NESO) chuan India hmar chhak pumah, Bangladesh atanga raltlan an tam avanga Assam sawrkar in hnawhchuah runpui a beih mek a thlawp bakah, state hrang hrang pawh chak taka hma la turin a duh a. India sawrkar lakpui pawh theih ang anga thlawp tur leh a tul anga hmala tura a duh avangin, NESO hnuaia zirlai pawl hrang hrang ten a rualin Sit-In Protest hi a buatsaih ta ni. 

India hmarchhak state hrang hranga Zirlai Pawlte hian, a rualin an mahni State Chief Minister hnenah Memorandum an thehlut nghal bawk.

Memorundum in a tarlang point hrang hrangte chu:

1) Dan lova pem lutte hriatchhuah thuai leh ram danga thawn chhuah theihna tura hmalakna khauh tak kalpui.

2) Indo-Bangla ramri khar.

3) Ramri thunun leh enkawltute tihchak a, a bik takin hmun khirh/harsa zawkah Security Personnel tling tak tak dah a, tunlai thiamna Surveillance Technology hmanga thuam nise.

4) Dan lova ram chhunga rawn pem lutte chu hmun dangah sawn kual mai mai an nih lohna turin thenawm State-te leh a kaihhnawih Agency-te nena thawhhona tha neih nise.

5) A ram leilung fate dikna, hnam ziarang leh nunphung, tawng, Politics leh ram neitu an nihna humhalh leh venhim ni rawh se.

6) Hmun thenkhat, mihring pun chak lutukna hmunah an chungchang ngaihtuahtu tur, Special Review Committee din ni rawh se.

Tunah hian awmze nei leh chak taka hmalak a nih loh chuan Hmarchhak ram leilung fate nihna (Identity) chu kumkhua a tan siam that theih tawh loh turin a danglam hlen dawn a ni.