January 16, 2023; March ni 1, 2023 atangin Bureau of India Standards (BIS) in a pawm chin leh a tlukpui helmet tha leh him chauh khum phal a ni dawn a, dawn bawhchhiate pawisa chawi tur chu Rs. 1,000 zel a ni dawn.

Aizawl Traffic SP chuan, Mizoramah satel helmet khum phal a nih loh thu a thupek chhuahin a lo tarlang tawh a. Supreme Court Committee on Road Safety thupek Ministry of Road Transport & Highways atanga hmuh leh Motor Vehicles Act, 1988 Section 129-in a sawi angin, two wheeler khalhtute’n helmet him leh rintlak an khum a ngaih thu tarlangin, "A siam dan leh nihphungah Bureau of Indian Standards (BIS)-in a pawm chin leh a tlukpui helmet tha leh him chin chauh khum tur a ni. Mizorama kan hman lar satel helmet kan tihte hi BIS pha lo a nih avangin khum phal a ni lo," a ti.

Two wheeler-a chesual zingah BIS pha lo helmet khum vanga thi an awm fo nia tarlangin Traffic SP chuan, Supreme Court hnuaia Committee thupek leh MV Act-te chu March 1, 2023 atangin khauh lehzuala kenkawh a nih dawn thu a puang a, harsatna an tawh loh nan leh an himna tur a nih avangin inhmakhua lawk turin two wheeler khalhtute a chah a ni.