May 18, 2023; Serchhip Bukpui leh Chhiahtlang inkar a tualthahna thleng chu Mizoram police te chuan darkar 48 ral hmain, pawikhawihtu a puh an man a, thu an zawtfiah mek.

Mizoram police chuan thuchhuah siamin, thawhhona tha tak avangin rang takin tualthattua rinhlelh man nghal a ni tih an tarlang.

An thuchhuah a an tarlan dain, May ni 16 zingkar khan Serchhip PS-ah Chhiahtlang leh Bukpui inkar, NH-54 ah tu tih hriat loh ruang chhar a nih thu an dawn a ni a. SDPO Serchhip hovin rang takin ruang chharna hmun hi thlen nghal niin, ngunthluk leh uluk taka hnu chhui hna thawh chhunzawm nghal a ni.

Ruang chhar hi Lalsangzuala (31) s/o Lalhmahruaia, Mission Vengthlang, Aizawl, NHIDCL-a thawk lai a ni tih finfiah a ni a. Hnu chhuina zuina atangin Lawrence Laldinthara (42) s/o J.Biakthanga(L), Khawruhlian, Aizawl District chu tualthattua rinhlelh ber niin, Serchhip Police leh Aizawl Police te tangkawpin ngawrh takin a zawn hna thawh nghal a ni.

He thil thlen atanga darkar 48 ral hmain, Dt.17.5.2023 chawhnu khan Aizawlah zawn hmuha man a ni ta a ni. Tunah hian he tualthahnaah hian midang inhnamhnawih an awm hriat a la ni lo. Serchhip PS Case No. 26/2023 Dt.16.5.2023 u/s 302 IPC ziah luh niin chhui chhunzawm mek a ni.
----