ZALEN February 10, 2025 : Thawhtanni zinglam dar 1:30 vel khan Darlawn Bazar-a Lalremruati D/o C.Lianzuala in chu a kang a, mitlawmngai tlan khawmin zinglam dar 2:40 velah thelh mih theih a ni. Kangmei chhuak vang hian inneitu Lalremruati a kang hliam.

Darlawn atanga thudawn danin Lalremruati in hi Thingpui dawr nen inkawp a ni a, a dawra a dah Refrigerators hnung lam atanga kangmei hi chhuak niin an sawi a. In hi concrete a nih avangin thelh chak a har a, kangmei kal zel hian thenawm awm, cement concrete RK Zauva in chu a hliau hman a, kawngkhar a kang chhia a, nasa zawka a kan hmain thelhmit hman a ni.

In kang vanga hliam, inneitu hi Darlawn CHC-ah enkawl tura hruai nghal a ni a, ngaihtuah awm lutuk a ni lo. In chhung bungrua a kang chhe deuh vek a, bungrua kang chhia hlut zawng hi cheng nuai 10 vel hu a ni.

In kang senghawi hian vawiin khan Darlawn khawtlang hnatlang koh nghal a ni a. Tin, Darlawn Jt.VC te hmalaknain Darlawn khaw chhunga All NGO te chu an thukhawm a, Darlawn BDO Lalzarzova chuan meeting a telpui bawk.