ZALEN July 27, 2023 : Lunglei Government College a thawktute chuan an thawhpui Associate Professor Lalthangliana chu Delhi-a a chet velna video tu ten emaw an lo lak sak, Meitei hovin an thah tak David Thiek thattu anga sawia video darh ta chiam avangin dinhmun hlauhawma dingah an ngai a, social media lamah thudik thehdarh sak turin mitin an ngen.

He video social media-a darh ta chiam-ah hian Lalthangliana hi David Thiek thattu Nongthombam Rohen Meitei angin sawi a ni a, amah hi Delhi-ah hian a zin mek a, he thil thlen chhan hi hmel inhai vang liau liau a ni a thawhpui te chuan an ti a, a nih loh zia social media lamah thehdarh turin mipui te an ngen a ni.

Lalthangliana hian social media-a a video darh tak chungchang hi sawifiahin, "Video a mi hi keimah ngei ka ni. Mi rawng taka thattu nen a min ngaihpawlh hi a vanduai thlak khawp mai. He video darh hian ka nunna pawh hlauhawmin a siam a. Ka chungah eng pawh a thleng a nih chuan, he video thehdarhtu te hian mawh an phur ang," a ti.

Lunglei Government College Assistant Professor hi a fapa admission ti turin Delhi-ah hian a kal a, he a zinna hian dinhmun hlauhawm taka a awmtir dawn tih a hre bik lo a. Mizoram-a a chhungte leh a thiante chuan a him theihna turin social media-ah thudik thehdarh turin mitin an ngen a ni. 

Lalthangliana hi Lunglei Govt College-ah Zoology Department-a Associate Professor niin College Veng, Lunglei-an an cheng a ni.