Aizawl May 18, 2023 : MPCC President Lalsawta chuan tu leh faten min chhuhchhal lohna turin sawrkar tha kan mamawh a ti a, dawihzep leh hlauh neia kal hman a nih loh thu leh dikna chu dah pawimawh a tul a ti a, tum nghet tak neia kal a ngaih thu a sawi. 

Lalsawta chuan, "Nakinah kan tu leh faten thinrima min chhuahchhal lohna turin vawiinah hian ram tana thil tha tih leh ngaihtuahna dik put hi a chhanna a ni. Chhuanlam engmah kan nei thiang lo. Mi ram leh hnamin min tih sak dawn lo, keimahni hi mawhphurtu kan ni," a ti. 

Vawiina Thakthing Veng YMA Hall-a Aizawl South-II Block Meeting neih a hmanpui naah MPCC President Lalsawta chuan, "Mizorama thihna nasa lutuk hian sawrkar tha kan mamawh zia a ti chiang a. Sawrkar tha siam lo tur hian sawrkar tum chi a ni lo, hun a tlem lutuk tawh. Dawihzep leh hlauh nei chunga kal hman kan ni lo, a dik lo chu a dik lo, a tha lo chu a tha lo, a tha chu a tha, a dik chu a dik tlang tur a ni. Kan kal tumna kan hria, kan pet goal-na tur lam kan hria. Tawng pawng pet avanga a ni lo lama goal sawn kan tum ve lo, Goal chu a ngaiah nghet takin a awm reng tur a ni," a ti. 

Lalsawta chuan, "Sawrkar Tha siam hi kan thei, mipui pawhin kan tlin. Mi tha, mi rinawm, Mizoram mipuiin an pawm, Politics bawhfuh tum lo leh tih fuh tum lo, Mizoram tana sawrkar tha siam tur Congress-ah an lo kal dawn. Anmahni ang mi huaisen leh mi dik hi Mizoram leh Congress party-in kan mamawh hi an lo kal dawn a, anni nena kan thawk ho ang a, Mizoram hi sawrkar tha kan pe dawn," a ti bawk.