Aizawl : Tun hnaia social media leh titi lama sawi hlawh tak, Dawrpui Local Council leh tlawmngai pawl / NGO ten an veng huamchhunga Food Truck te zan lama din an phal loh chu an dinna ngaiah an la ding reng tih Zalen an hrilh. Police lam chuan a hranpaa heng sumdawngte hi venhimna pe thei an nih loh thu an sawi ve bawk.

Food Truck din phal tawh loh chungchangah hian Dawrpui Local Council Chairman Zosangzuali chuan, "Kan dinna ngaih kan la ding reng. Anni lam hian dilna pawh an rawn thehlut tawh a, mahse, ngaihtuahna hman a la awm lo," tiin Zalen a hrilh.

Dawrpui khawtlang leh Food truck te inkar boruak chungchangah hian Zalen chuan Aizawl SP C. Lalzahngova chu a bia a, he an buaina chungchangah hian pun an nih lem loh thu a sawi. Aizawl khawpui laili a harsatna awm thin chungchangah hian Aizawl SP chuan, mimal sumdawnna thilah venhimna pe thei an nih loh thu a sawi a, awmchilh reng thei an nih lo thu leh he lai hmun kaltlang hian patrolling an neih fo thu sawi langin, buaina chhuah lai erawh an nang ching lem ngai lo, niin a Zalen a hrilh.

Social media lamah food truck tihtawp chungchang hi nasa takin khel a ni a, group pakhatah phei chuan opinion poll pawh lak a ni a, din phal tawh loh tha ti lo an tam fal hle. Post tam takah Dawrpui lam demna rawngkai hmuh tur pawh a tam hle a, thenkhatin he food truck awm an tangkai pui zia leh hlu an tih thu an ziak nasa hle. Food Truck neitu lam pawhin Dawrpui huam chhunga din phalsak an ni ta lo chu an hriatthiam theih loh thu te, anmahni mai bakah an hnuaia thawktur te eizawnna tihtawp sak ang hial ten an tarlang.

Dawrpui khawtlang lam chuan an huam chhunga buaina chhuah phahna leh tul lova heng buaina thlenga inrawlh ngai thu thil ni theiin an hre lo thung a, chuvangin an huam chhungah hian hetiang a thlen tawh lohna turin, din chhunzawm hi an phal tawh lo ve thung. Din an phal tawh lohna chhan a sawinnaah Dawrpui Local Council Chairman chuan, "An customer te vanga buaina chhuak a ni a, din tir tawh loh mai hi kan tih tur a ni," a ti.

Food Truck lam hi Dawrpui hian an huamchhungah din tir an phal tak lovah hian, tun hnai mai atang khan Assembly House ep, Secretariat hlui tual zau laiah an inkulh thin rih a ni.