Aizawl June 12, 2024 : Dawrpui Local Council chuan an venga inkahna thleng chungchangah thuchhuah an siam a, Dawrpui khawtlang hruaitute Joint Committee thuchhuak angin Dawrpui Veng huam chhungah Dawrpui Local Council hriatpuina tel lo pawisa khawn phal a nih loh thu an tarlang.

Dawrpui LC chuan Vawiin chawhma dar 11:00 vel khan Aizawl Mosque bul dawrah hnamdang pakhat dawr nghaktu chu pistol-a kah a ni, an ti a. A kaptu hi Lalnunsanga (32) s/o Hrangthuama (L), Armed Veng South nia inchhal a ni. Hei hi Pawisa dil, dawr nghaktu in a pek duh loh avanga thilthleng ni a hriat a ni an ti.

He thilthleng hi Dawrpui Local Council chuan pawi an ti a, hemi chungchang hi Dawrpui Local Council chuan a tul anga hmalak zui zel an tum a ni.

Dawrpui khawtlang hruaitute Joint Committee thuchhuak angin Dawrpui Veng huam chhungah hian mimal emaw eng pawl pawhin Dawrpui Local Council hriatpuina tel lova pawisa khawn hi phal a ni lova, khap tlat a ni tih mipuite an hriattir nawn leh a. Tilui an awm anih chuan atul anga hmalak zel a ni ang tih an hriattir nghal bawk.