Aizawl September 23, 2023 : Aizawl South III bial chhunga Congress atanga KS. Thanga zui chhuaka ZPM zawmtu mi thahnem tak chuan ZPM-in dawta an bum avangin ZPM chhuahsanin, MNF an zawm tih an sawi.

Aizawl Press Club-a thuthar thehdarhtute an kawmnaah he thu hi sawiin, Congress sawrkara minister thin, KS Thanga chu August 24, 2023 khan Vanapa Hall-ah lawm luh a nih thu leh chumi rual chuan a hote thahnem tak lawm luh nghal an nih thu an sawi.

“ZPM-ah rinawm taka awma kan theihna ang anga hnathawk tura kan inruahman mek laiin ZPM-in an intiam ang an tih leh tak loh avangin thutlukna dang siam leh a ngai ta a, pawi kan tih hle a ni,” an ti.

ZPM party-in KS Thanga chu vice president post pek an tiamna chu voice record pawh an neih thu an sawi a, lawm luh a nih hnuah a inah lenchilhin vice president post an pek theih loh thu an hrilh leh nia sawiin, “Bumtu party chu beidawngin kan chhuahsan leh ta a, kan pu ber pawh hian kan hriat theih chinah chuan chawlh rih a duh a ni,” an ti bawk.

“Kan pu hova ZPM kan zawm dawn hian vawi eng emaw zat inbiakna neih a ni a, ‘party-a kan lut dawn rau rau a nih chuan kan pu ber hian nihna zahawm ve tawk tak nei se’ tiin ZPM vice president post kan dilsak a, ‘ZPM vice president-ah kan hotupa hi min dahsak theih chuan ZPM kan rawn zawm ang,’ tiin thutlukna kan siam a ni,” ti bawkin, he an duhna hi ZPM Elected OB chuan an rem ti niin an sawi.

ZPM president hi kohhran upa a ni a, an leader pawh kohhran upa a ni a, an vice president zinga pakhat pawh pastor pension meuh a ni tih sawi bawkin, “Hetiang miin kan pu leh a hote min bum duh hi a mak hle a, a rilru natthlak hle,” an ti.