February 19, 2024; Tlabunga Sorkar department hrang hrangten Lunglei bawrhsap Ramdinliani zarah, tul bik thila veivahna atan a thlawna hman tur lawng changtlung tak an nei tawh dawn.

Sorkar department hrang hrangin hma an lakna tam zawkah lui dung an zawh a ngai fo a, lawng hman tur hmuh remchan mai loh vanga harsatna an tawh ṭhin chu sutkian a ni tawh dawn.

Tlabung leh a chhehvel bik atan meilawng mamawhna a sân thu, Tlabung SDO (C) H Zonunmawia'n Lunglei Bawrhsap hnenah a thlen a; hun rei lo te chhungin Lunglei DC Ramdinliani'n a tihhlawhtlinsak nghal.

Lunglei Bawrhsap chuan, meilawng veivak tur chu sawrkar department hrang hrangin ṭul bik thilah a thlawnin an hmang thei dawn tih, a puang a; hetih lai hian tuialhthei erawh anmahniin an intumchawp a ngai thin dawn tih a sawi.

Khawthlangtuipuia meilawng dah tak chu department hrang hrang, a bikin Health department lam tan a ṭangkai lehzual hle dawn niin a sawi a; khuarel chhiatna thlen thulhah a mamawhtute tan hman theih tura ruahman a nih thu, Ramdinliani chuan a sawi bawk.

Tlabunga SDO (C) office enkawl zui tur meilawngah hian, tunlaia hman tlanglawn tak engine hman a ni a, lawng lenzawng pawh a vantlang pawl tak niin, tum khatah mi 8 an chuang thei dawn a ni.