Aizawl August 24, 2022: Vawiin khan Mizoram leh Assam ramri a district pangnga, Kolasib, Mamit, Cachar, Karimganj leh Hailakandi Deputy Commissioner-te chuan 225 CRPF Camp, Vairengte-ah thutkhawmna an nei a. Mizoram chhunga kuhva hring tharchhuah chungchang leh Tlawngte lui leh Bairabi-a lei dawh thawh chhunzawm dan tur te sawiho a ni.

Deputy Commissioner, Kolasib, John LT Sanga chuan kalkhawmte lawmna thu a sawi a, State pahnih inkar ramri buaina chinfel a nih theih nan leh boruak muanawm a awm theih nan Assam leh Mizoram Home minister-ten thla 2 chhung a vawikhat thutkhawmna nei tur a tih a nih thu a sawi a. He thutkhawmna kaltlang hian mahni district-a harsatna awm te sawihona hun neih leh thawhhona tha tak hnuaia chinfel thin beisei a nih thu a sawi.

Thutkhawmnaah hian Mizoram leh Assam lam a Police duty-te inkar a inpawhna țha a awm theih nana hmalak dan tur sawi a ni a, ramri hnaih a chengten an huan, lo ram tha taka an enkawl chhunzawm theih dan tur sawi a ni bawk. State pahnih inrina bawr vela ram ngaw awmte humhalh kawnga thawhho dan tur te, ramri kana dan phal loh ramsa tawlhrukna awm thin ven dan tur te an sawi. Ramria Police duty-na hmun thawmthat hna hrang hrang kalpui a nih rualin heng duty-na hmun kaltlanga hmalakna awm lo tura ruahmanna siam a tul thu sawi a ni. 

Mamit district-a kuhva chingtuten an kuhva rah hralhna kawngah Assam lamah harsatna an tawh thin thu sawi lan a ni a, Mizoram chhunga kuhva hring tharchhuah te chu harsatna awm lova hralh a nih theih nan hmalak dan tur sawi a ni. Thinghlun khaw bul a Tlawngte lui a lei dawh hna leh Zophai, Bairabia lei dawh hna chhunzawm dan tur sawiho a ni a, harsatna lian zual awm te chu chinfel a nih theih nan hotu lian zawk te hnen a thlen tura rel a ni bawk.

Shanawaz, DIG, CRPF chuan ramria duty hna chu uluk takin an kalpui ttih a sawi a. Mipuiin harsatna thenkhat an lo thlen te chu sutkian a nih theih nan duty-na hmun pawimawh zualah te CCTV nen thlithlai thin a nih thu a sawi.