Aizawl: Mizoram Pradesh Congress Committee (MPCC) chuan India rama Pathian thu zirna hlun ber, Theological College hrang hrangte pawhin affiliation an tihna thin Serampore College (University)-in MPCC President leh Mizoram CM hlui Lal Thanhawla honorary doctorate degree, Doctor of Divinity (DD) a hlan tur chu ropui an tiin lawmawm an ti hle tih an sawi.

Nimina thuchhuah an siamah MPCC chuan Lal Thanhawla hi Kohhran leh khawtlang tana a thawhhlawk em avanga chawimawina sang Doctor of Divinity (DD) hi hlan tur a ni tih sawiin November 30, 2019-a Hyderabad khawpuia Serampore College (University) Convocation-ah hlan a ni dawn niin an sawi a. Serampore College (University)-in lawmman an hlan chhan chu India ram, Hindu kulmuk tamna rama ram hruaitu lawkte zingah Kristian leader anga hriat hlawh anih vang nia sawiin Kristian te thiltihna ah a telpui thin avangin sakhaw dang kara Kristian tlemte awm ten ngaihpawimawh an hlawh phah a. India ram hmun hrang hranga Kristian-ten tihduhdahna an tawh changin Kristian te thlavang hauhin na takin a tawngchhuak thin a, chu chuan awmzia a neiin, tihduhdah tuar mek ten an thlamuanpui thin hle niin an sawi bawk.