Aizawl; Mizoram sawrkar chuan December 1, 2022 atangin Aizawl leh district khawpui dangah te LPG home delivery kalpui tumin hma a la mek.

ZALEN-in Food, Civil Supplies & Consumer Affairs department thawktute hnen atanga thu a dawn danin November 14, 2022 a thuneitu sang thukhawm chuan ‘December, 2022 atangin home delivery hi Aizawl bakah district khawpui dangah kalpui tan nise’ a tih angin distributor (gas agent)-te pawh mahni bial theuha lo inring turin hriattir an ni tawh tih an sawi.

Home delivery chu district khawpui zawng zawng nen kalpui tum ni mah se vawilehkhatah chuan kalpui nghal vek theih a ni lo mai thei tih sawiin FCS&CA thawktute chuan, “Home delivery kalpui tur hian mipui (consumer)-ten KYC an tihfel vek a ngai a, KYC a fel loh chuan gas an book thei dawn lo a. Chhungkaw eng emaw zat hi gas an book laia phone number leh tuna an phone no. inang lote a awm avangin a tirah chuan harsatna kan tawk mai thei a. Mahse, reilo te-ah a fel mai kan beisei a ni,” an ti a. Gas book dan chu Central YMA kaltlangin branch YMA chanchinbu hrang hrangah tihchhuah leh an la tum niin an sawi bawk.

Gas home delivery hi kum 2019 atang khan bultan niin a hmasa ber atan Mizofed chuan College vengah bul an tan a, a hnuah Zothan Gas Agency-in Zonuam vengah, Caravan-in Falkland leh Suakchhunga Gas Agency-ten Dawrpui vengah te an tan leh a. Tun dinhmunah pilot project-a thlante bakah Aizawl khawpui chhunga veng 14 leh Serchhip leh Kolasib a veng pakhat ve ve-ah kalpui mek a ni.