Aizawl November 7, 2022 : November ni 1, 2022-a Secretary, Food, Civil Supplies & Consumer Affairs Department thuchhuah angin December ni 1, 2022 atangin Aizawl Municipal Corporation area huamchhung leh district khawpui zawng zawnga LPG consumer te inah eirawngbawlna gas dahsak/pek (LPG Home Delivery) tan tura tih a nih thu tarlan a ni. 

He thuchhuah Sawrkar order No.B.12013/4/2017-FCS&CA dated 19.12.2019 behchhanin delivery charge cheng 70 aia tam lo consumer te an laksak thei ang tih tarlan a ni tel bawk.

LPG Home Delivery hi a enchhin nan (pilot basis) Aizawl Municipal Corporation area huamchhunga veng 4 ah May ni 5, 2019 atangin kalpui tan a ni a. Tunah hian veng 29 ah kalpui mek a ni. He ruahmanna hlawhtling taka kalpui a nih theih nan inrawnkhawmna leh sawihona tum engemaw zat IOCL hotu te, LPG distributor-te, Local Council hruaitute, NGO aiawhte bakah consumer aiawh ten an nei tawh. May, 2022 pawh khan hemi chungchanga inhrilhhriatna heng vengah te hian IOCL leh Mizoram Consumers’ Union te nen tang hoin Directorate of Food Civil Supplies & Consumer Affairs chuan an kalpui bawk a ni.

Home Delivery chungchangah Ministry of Petroluem & Natural Gas in Liquified Petroleum Gas (Regulation of Supply & Distribution) Order 2000 dated 26.04.2000 a chhuah bung 9(e) in a sawi angin a mawhphurtu Sawrkar enkawl Oil Company phalna la hmasa lovin distributor tumahin an hnenah consumer inziaklutte hnenah home delivery a ti lo thiang lova, mahse hemi atan hian State Sawrkarin, an ram leilung awm dan leh distributor te kalkualna tur ngaihtuah chungin, home delivery atana consumer ten pawisa an chawibelh tur a tuk thei a ni. Hemi zulzui hian Mizoram Sawrkar chuan distributor ten home delivery atan consumer te hnen atangin cheng 70 dang an lak belh thei ang tiin a ruahman a ni.