Aam Aadmi Party (AAP) kaihhruai sawrkar chuan zu chungchangah sawiselna nasa tak an tawk a, hei vang hian September 1, 2022 atang chuan zu dan hlui zawk chu hman a ni leh dawn tih an puang. Delhi sawrkar hian zu chungchangah hian dan thar a siam a, mahse sawiselna a nasat em avangin an hmang zui dawn ta lo a ni. 

September atang chuan sawrkarin hmun ruat bik 500-ah zu dawr a siam ang a, mimal kutah a awm tawh dawn lo. Mimal enkawl zu dawr zawng zawngte chu August thla hian a titawp vek dawn a, kumin chhungin sawrkar chuan zu dawr hi 700 hawn hman a tum thung dawn a ni. Hei bakah hian man tlawm zawka lei theih hunte leh a leitute tana hamthatna tur hrang hrang a duang dawn bawk.  

November 2021 atang khan mimal zu dawr hi a kalpui tan a, mahse sawiselna a nasat avangin a titawp leh dawn ta a ni. Mimalin zu dawr an neih hian dan loa hralh chhuah a tam hle nia tarlan a ni. Delhi sawrkar hnuaia corporation pali - DTTDC, DSIIDC, DCCWS leh DSSC te chauhin zu hi an zuar thei tawh dawn a, ram chhung leh ram pawn siam brand 1,000 chuang an zuar dawn a ni.