Aizawl : State hrang hrang atanga a nawlpuia rawn haw a reh hnuah, nitin Mizoram panin haw an la awm reng a, lirthei hmanga rawn haw chu a tam ber an ni a, tunkar chho pawh khan thlawhna hmangin tum khat rawn phurh thlen leh an ni. Hri kai tamna Mumbai leh Delhi lam atanga rawn haw tur pawh an la awm a, Mumbai lam hian Bus-a rawn haw chho, kawng laka thang mek leh haw tum an la awm bawk.

Mizoram pana rawn haw te hi a hma anga a hu hova rawn haw chu an tam tawh lo a, mahse, haw hi an awm ve reng a, Mumbai leh Delhi lam atang pawhin rawn haw tum chu an awm a, mahse, an hun tur an la hre lo. Mumbai lam phei chuan Pune lam nena inthuruala Bus-a rawn haw dan an ngaihtuah a, nimin khan a then chu an rawn chhuak tawh a, rawn la ha tum an la awm a, sawrkar chu an innghahna a ni. Delhi lam pawh Mizoram sawrkar leh Railways lam thu-neitute kutah an innghah tawp thu ZALEN an hrilh.

Delhi leh Mumbai lam hian haw tur in-report an ngah tawh loh thu an sawi a, haw tur in-report hun an hawng reng a, mahse, mihring lam hi an awm meuh tawh lo niin an sawi. Delhi Mizo Welfare president, R. Lalremruata chuan, "Mi 100 chuang awrh chauh haw tura in-report kan la nei a, in-report turin hun kan la hawng zel. Engtikah nge kan haw dawn tih kan la hre thei lo. Mizoram sawrkar hian Railways lamah hian dilna chu an thehlut tawh niin kan hria a, mahse, kan haw hun tur kan la hre lo," a ti.

Mizorama rawn haw zingah Delhi atanga rawn haw ten Covid-19 an vei tam bik chungchang a sawinaah R. Lalremruata chuan, "Kan hrethiam bik lo. Delhi-ah hian test neih hi a har em em a, symptoms nei lo chu test an ni ngai lo. A nawlpui rawn haw dawn pawh khan khawsik chiah an en a, a lehlamah Mizoram-ah pawh khan RAT chu an paltlang ve tho a, swab test-ah erawh a lang ta a ni," a ti a. "He lamah chuan tun thleng hian covid positive case kan la nei hran lo. Rawn haw te pawh khan an neih kan hre lo," tiin a sawi bawk.

Mumbai Mizo Association secretary V. Lalrindika chuan sawrkar lam hian Rel chu an hawna turin an buatsaih sak a rin thu a sawi rualin, Bus-a rawn haw mai an duh zawk thu ZALEN a hrilh a, nimin khan thenkhat chu Bus hian an rawn chhuak a, hei hi an him tlang theihna tur zawka an ngaih a ni. Haw tum mi 25 ver bawl in-report an awm a, sawi tawh ang hian anni hi Pune lam nena inthuraul an ni. Mumbai-a Mizo Covid-19 lo kai tawh te chungchang a sawinaah Rindika chuan, "A tira 7 te kha chu an discharged na a rei tawh a, Ningani khan pakhat pawh damdawiin atanga chhuahtir a ni leh tawh a, hemi hma hian pakhat chu chhuah tir a lo ni tawh bawk," tiin a sawi.

Mumbai atanga rawn haw tawh zingah kai an tam loh chhan nia a hriat sawiin Mumbai Association hruaitu chuan, "Hot spot kan nih kha a lehlamah chuan kan vanneihna a ni, kan hlauh avangin kan fimkhur law law a, kan inkhung hrang tha a, kan inlenpawh lo bawk a, kan vanneih phah a ni," a ti.