August 1, 2022; Excise & Narcotics Department (END) hotute chuan tunlaiin Mizoramah ruihhlo (heroin) tualleng a tam thu leh chung chu Mizoram a ruihhlo khawih te mamawh (demand) aia tam daih a nih thu an sawi. Hetihlai hian Mizoramah kumin chhungin ruihhlo vanga thi mi 18 an awm awm tawh.

ZALEN zawhna chhangin END hotute chuan, tunlai a heroin man tam ber te chu hralhna tur lam pawh a zuartute ten an hriat lem loh a nih thu an sawi a, Mizoram pawn a ken tur pawh an man nasa niin an sawi. "Mizoram a ruihhlo khawihte demand a sang lutuk lo niin a lang a, chutihlaiin Myanmar lama khawsak harsatna vangin an rawn risk thla nasa a, state pawn a keng tur hnamdangte hnen atang pawhin kan man thin, a man pawh kan man hnem," END hotute chuan an ti.

Hetihlai hian Mizoram hmun hrang hrangah ruihhlo a hluar chho mek zel nia an hriar thu te, a bikin district capital hrang hrangah ruihhlo khawih an tam nia an hriat thu te an sawi bawk.

END chhinchhiah danin, kumin, July ni 25 thleng khan Mizoramah ruihhlo (heroin) vanga thi mi 18 an awm tawh a, chung zingah mi 17 te chu mipa niin, hmeichhe 1 a awm.

Tunhnai khan Mizoram police chuan thuchhuah siamin, naupang kum tling lo te pawh ruihhlo zawrh thilah an inhnamhnawih tawh tih an tarlang a, ngaihtuahna a kal thui thu leh tan tlan a ngaih thu an thuchhuah ah chuan an tarlang. Police thuchhuah tarlan danin, District Special Branch, Aizawl chuan ruihhlo zuar, Champhai Vengthar lam mi, naupang kum tling lo hnen aṭangin ni 27.7.2022 khan Heroin gram 49, international market rate-a Rs. 24,67,000/- man hu chu Ramhlun South bus stand-a a zawrh laiin man a ni.