ZALEN July 27, 2024; Designing zirlai, B. Malsawmzeli (23) d/o B. Zachamliana, East Lungdar chu bathroom-ah nikhawhrelo-a hmuh a nih hnuin a boral.

East Lungdar atanga ZALEN thudawn danin, B. Malsawmzeli te hi Tuikhuahtlang (Aizawl) a in luah a khawsa an ni. Designing zirlai niin, nimin a class kal tur a chuanna city bus ah nikhawhreloin a awm a, civil hospital, Aizawl panpui niin, test thenkhatte an tih hnuah in lamah haw pui a ni. ( A test CT scan etc. result vawiin 27.7.24 a lam tur an ni.)

Harsatna a neih neih zui hriat a ni lo a, nizan inbual tura bathroom a lut chu a rei tak deuh avangin a chhungte ngaihtha loin kawngkhar an tichhia a, nikhawhreloa a lo awm an hmu a, chhan tlak a lo awm tawhlo a ni.

Thudawnna in a sawi danin, B. Malsawmzeli hi a naupan laiin a kaih nasa thin a, hei hi tunhnaiah a rawn chhuak leh thin nia hriat a ni.

Amah hi polytechnic ah designing zirchhuak tawh niin, chumi hnuah private a zir chhunzawm leh mek a ni.

A ruang hi nizan khan an khua East Lungdar panpui niin, vawiin chhun dar 12 ah vui a ni ang.