Aizawl July 29, 2022 : School Education Minister Lalchhandama Ralte chuan Mizo Grammar Society buatsaih ‘Mizo Tawng Ziah Dan Dik’ bu a tlangzarh naah Mizo tawng pholan a nih theih nan sorkarin hma a la zel, a ti. Mizo Grammar Society hruaitute chuan an lehkhabu chu Mizo tawng ziah zawm leh zawm loh tarlanna, dictionary anga hman tur a ni tih an sawi. 

Minister chuan lehkhabu  tlangzarhnaah thu sawiin khawvel hriata Mizo tawng pholan a nih theih nan sorkarin hma a la zel a, Mizo tawng tihmasawn te, hnam inpumkhatna tura Mizo tawng pawimawhna te hriain a tihhausaka tih lar hi hnam anga ram lak nan a tul tih sorkarin a hria a ni a ti.

Minister chuan Social media-ah Mizo tawng hman dan dik lo a tam a, thangthar te zingah ziah dan dik hre lo an tam tawh hle tih sawiin Mizo Grammar Society-ten ziah dan dik hriatna tur lehkhabu an chhuah chu lawmawm a tih thu a sawi. Mizo tawng ziah leh hman danah tun hmain thuneitu mumal an awm lo tih sawiin tun hnaiah sorkarin School Education Department chu thuneihna a pe a ni a ti bawk.

Mizo Grammar Society hruaitute chuan an lehkhabu chhuah chu Mizo tawng ziah zawm leh zawm loh tarlanna a ni a, dictionary anga hman tur a ni  tih an sawi a, Grammar behchhana ziah a nih avangin an lehkhabua an tarlan te chu inhnialna a lo awm a nih pawhin sawihona neihpui an in peih reng tih an sawi a ni.