Aizawl : Gov't Zirtiri Residential Science College auditorium-ah nimin khan Aizawl City College Joint Students' Union (ACCJSU) chuan Assembly Cum Election an nei a, he hun hi Zodintluanga, MLA, Treasurer MPCC chuan khuallian niin a hmanpui.

Zodintluanga chuan Aizawl chhung college zirlai hruaitu kalkhawmte hnenah hian, "Ka pa min chah thil pawimawh tak ka chah duh che u a, 'dikna, rinawmna leh taimakna nen engah pawh kal chho ila, hei hi kan neih chuan mihring hi a hlawhchham theih loh, i rinawma i dik chuan mi hausa ber pawhin a chahbi a kawltir ngam ang che' tih hi a ni," a ti a, he thu hian amah ngei pawh a politic kalkawngah a kaihhruai thu a sawi.

Zirlaite chu tum nei tura fuihin, "Lehkha in zirlai aṭang hian tum nei sa ran ula kan hun laia tum nei sa rante chu vawiinah mi hlawhtling an ni, in tuina in hriat a ngai bawk a ni," a ti a. Mizote chu hnam zakzum kan nih avangin puitlinna kawngah ṭan lak kan ngai a, puitling bula mahni ngaihdan sawi ngam a ngai, "Intih lal hi a hlauhawm khawpa mi zawng zawng tih ṭhatte hi a pawimawh a ni.

Sapṭawng hi i hmang zak lovang u, kan inhriatpawh theih khan a tawk," tiin zirlaite sapṭawng zahpui lo turin a chah. Zodintluanga chuan, "Politics tel lo chuan khawvel hi a kal thei lo. Sorkar a kalsual chuan zirlai pawlten khalh ngil turin nasa takin a tuar ṭhin. Sorkar khalh ngil tur hian in pawimawh hle a, huaisen taka khalh ngil turin ka chah che u a ni," a ti.

He huna Khualzahawm Apex Bank Chairman T. Lalmuanpuii pawhin zirlai kalkhawmte chu an nun vawng ṭha tura chahin, "I thawmhnaw branded-in awmzia a awm lo, i nun branded rawh se," a ti.

ACCJSU Assembly cum Election-ah hian Aizawla College sawm (10) aṭangin zirlai hruaitute kalkhawmin session hnihnaah kum 2031-2022 chhunga an hruaitu turte an thlang nghal a ni.