Aizawl: Chhungkaw 1,800 dawn chenna Dinthar veng chuan Covid-19 avanga an veng containment zone-a an puan atanga nimin thleng khan cheng nuai 17 chuang an dawng tawh a, he thu buatsaih lai thleng hian CM Relief Fund atanga an sum hmuh tur an la dawng lo a, veng hrang hrang leh khaw hrang hrang atangin nitin mamawh hrang hrang an dawng thung a ni.

Dinthar Local Level Task Force atanga ZALEN-in thu a dawn danin veng hrang hrang atangin tanpuina thahnem tak an dawng tih an sawi a, veng hrang hrang YMA, LLTF leh mi mal hrang hrang atanga sum an dawn chu nuai 17 chuang, mi 100 vel hnen atangin an dawng a. Chhungkaw 675 pek tur CMRF atang hian cheng nuai 6.75 dawng tura tih niin fel thawkhata an ngaih thu an sawi.

Nitin mamawh thlai chu Sairang, Tuikhuahtlang leh N. Hlimen atangin an dawng a, mi mal eng emaw zatin ni tin chawhmehte hi an pe bawk. An ni tin mamawh sem chhuah nan hian cheng nuai 10 chuang an seng tawh a, nimin pawh khan chhungtinah artui plate khat theuh leh chini leh bawnghnute an sem.

Dinthar LLTF Secretary, C. Vanlalhruaia sawi danin an veng hian AAY (card eng/sen) leh PHH (card pawl dal) te chu an ration an khulsak vek a, card var hmang thenkhatte pawh an ration hi an khulsak thu an sawi. Gas nei lo leh damdawi mamawhte pawh an lamsak mai thin thu a sawi bawk.

Dinthar hian hri pui vei tawh 89 neiin vei mek 36, dam chhuak 52 niin pakhat a thi a. Mi 1,496 test an ni tawh bawk.