Aizawl: Mizoram sawrkarin Journalist boralte ralna a pek thin Ex-Gratia Rs.1,50,000/- chu nimin khan nikuma chatuan ram pan ta Rihlipui Daily Newspaper Editor D.K. Lalhruaitluanga nupui Laldinpuii hnenah Mizoram sawrkar aiawhin Dr.Lallawmkima, DIPRO Champhai chuan an chenna In, Champhai Vengthlang-ah a hlan.

Dr.Lallawmkima chuan chanchinbu kaltlanga ram leh hnam rawngbawlna kawnga D.K. Lalhruaitluanga thahnemngaihna leh inpekna chu chhuanawm a tih thu a sawi a. Sawrkar thu leh hla mipuite hnena puanzar kawnga a tha thawhte chu sawrkarin a hre reng tawh dawn a ni, a ti. DIPRO chuan sawrkarin Journalist-te hamthatna hrang hrang a siam thu a tarlang bawk.

Ralna hun hi Lalhmingmawia Pachuau, President MJA Champhai District chuan a kaihruai a, Lalhlupuia, Vice President, MJA Champhai District chuan lawmthu sawiin hun a khar a ni.

D.K. Lalhruaitluanga (L) puala sawrkar ralna buatsaihah hian District Information & Public Relations Office, Champhaia thawkte leh MJA Champhai District member-te an tel a ni. Mizoram sawrkar chuan Accredited Journalist boralte Rs 1,50,000/- leh Non-Accredited Journalist boralte Rs 1,00,000/- in a ral thin a ni.

D.K. Lalhruaitluanga (L) hi R.Laihnuna DK (L) leh Vanlalhmuchhuaki (Tevani) te fa pali zinga a upa ber dawttu niin June ni 14, 1980 khan Champhai-ah a piang a. June ni 25, 2003 atang khan Rihlipui chanchinbu chhuah tanin, February 2006 ah Mizoram Journalist Association (MJA) Member atan lakluh a ni a. Kum 2012 atangin Champhai District MJA Executive Committee Member-ah lutin, kum 2012-2014 chhung khan Fin. Secretary hna a lo chelh tawh a ni.