Aizawl: ZMC a Covid 19 enkawltu Doctor pakhat, tun hnaia futsal khel chu sawrkarin insawifiah tura a hriattir angin insawifiahna lehkha a thehlut tawh a, a lehkha hi sawrkar lam chuan an zirchiang mek. Zalen-in Health Secretary H.Lalengmawia IAS hnen atanga thu a dawn danin Doctor hian a insawifiahna lehkha hi Health Director-ah a thehlut tawh a, sawrkar chuan a insawifiahna hi a zirchiang mek niin a sawi.

Zoram Medical College-a Covid-19 damlo enkawltu zinga doctor hi July 20, 2020 khan hri a vei tih hmuhchhuah a ni a. Doctor hi hemi zan hian Grace Nursing Home & Research, Zarkawt leh City Hospital, Mission Veng hnathawkten Malsawma’s Yard, Durtlang Leitana futsal an khelhnaah telin a hnuah Covid-19 a postive tih hriat chhuah a ni a, sawrkar lam chuan show cause a pe ta a ni.