Aizawl February 7, 2023 : MNF Thalai thuchhuah chuan Chief Minister Lalduhoma hnuaiah thil ti sualtua puh Police Lock Up-a khung luih tum vangin medical exam vawi-3 neih nawn tir a ni a, Doctor-te leh Police-te lakah thuneihna hmansualna nasa tak a thleng a ni, an ti.

Thuchhuah chuan, "Chief Minister Lalduhoma'n 10/05/2023-a Court-a Criminal Complaint a thehluh bawhzuiin, Cyber Crime Police Station Aizawl chuan Lalduhoma hming tarlanna thu post pakhat an chhui zui a. J. Rosangpuia (Spa Jongte) chu thil ti suala puhin Police te chuan 05/02/2024 zan khan Falkland Venga a chenna in atangin an man a, Aizawl Police Station Lock Up ah zankhat a riah hnuah 06/02/2024 khan Court-ah hruai a ni a. Police ten darkar 72 kawl an dilna chu Court in a phalsak a ni," an ti.

MNYF chuan, "Dan pangngai angin Police te hian 06/02/2024 thim hlimah khan J. Rosangpuia hi Lock Up-a dah turin a hriselna a tha tawk em tih Aizawl Civil Hospital ah an enfiahtir a, amah hi thla 2 kaltaa accident avanga nikhaw hre lova lo awm tawh, nghawng ruh fel lo (Cervical spondylosis) nei, inenkawl lai anih bakah BP sang nei a ni a. Civil Hospital Aizawl-a endik anih lai hian damdawi eitir nghal ni mah se, a BP a tla hniam thei lo a, Medical Officer Duty chuan Police Station Lock Up-a khung turin a hriselnain a tlin rih lo tih report a ziak a. Police ten chhuah lailawk tir rih mai an tum laiin, Chief Minister Office atanga chhuak ni ngeia ngaih thupek khauh tak Police te leh Doctor te hian an dawng ta a, Police te hian J. Rosangpuia hi Aizawl Civil Hospital ah bawk hruai nawn lehin Doctor Duty chu medical Exam tih nawn luih tir leh a nih hnuah Police te hian Police Station lamah an hruai leh ta a ni," an ti.

"Police te leh Doctor ten thuneitu sang ber atanga na taka nawr luih an tawk tih an hriat hian J Rosangpuia chhungte leh a thian tha, chanchin ngaihvena Police Station-a kalte chuan mihring thih leh dam kar thil anih avangin, J Rosangpuia hriselna dinhmun hi enfiah nawn leh an ngen a, zan dar 10 hnu lamah Police Station atang hian Civil Hospital ah bawk hruai nawn lehin, Senior Doctor in a hriselna dinhmun hi a endik nawn leh ta a, a BP hi a sang hle tih finfiah nawn leh a ni a, a hriselna dinhmun hi vilzui ngai a ni tih finfiah anih avangin Senior Doctor hian Civil Hospital-ah hian a admit nghal a ni," an ti bawk.

Mizo National Youth Front (MNYF) chuan Chief Minister Lalduhoma pawi sawitua puh anih avanga J Rosangpuia chunga hleilenna nasa tak a thleng leh, a ti sual ngei em tih Court in a finfiah hma hauha a chunga mihring dikna chanvo bawhchhiatna nasa tak a thleng hi an dem a, Police te kutke-a hmang luia Sawrkar thuneihna hmansualna nasa tak a thleng leh Doctor te thiamna leh hriatna rilhlelhsak an ni te, mualpho thei ang bera medical exam vawi 3 lai tih nawn tir an ni te hi Mizoram chu sawi loh, India ram hmun dang leh khawvel hmun dangah pawh thil la thleng ngai lo niin an hria a. Chief Minister Lalduhoma sawrkar hnuaiah Doctor te meuhin hmuhsit leh rahbeh an tawk chu na an ti a. Hetianga mi chak lo zawk leh thil ti thei lo zawkte chunga Dan piah lama thuneihna hmansualna leh hleilenna hi tu chungah mah thleng tawh lo se an duh thu an tarlang bawk.