Aizawl : Covid-19 laka invenna tur vaccine kum 18-44 inkar te tan pekchhuah tan a ni leh tawh a, vaccine hi sawrkar laipui atangin dose 16340 chu Mizoram sawrkarin a dawng a. Ruahman dan chuan June thla chhung hian dose 25,380 dawn leh hman an beisei a ni.

Covid-19 vaccine hi April 20, 2021 atang khan kum 18 leh 44 inkar, sawrkar laipuiin vaccine la hmasa tura a tih te zinga mi ten an la tan a, hemi hnu hian chawlh leh zawk niin June thla tir atanga khan Aizawl-ah chuan hmun hnihah lakna siam a ni leh a, tunah hian Tuikual Presbyterian Hall leh Ramhlun Vengchhak Presbyterian Kohhran Hall-ah te vaccine hi pek mek a ni. Aizawl pawn lam dawn hun tur chiah hi hriat a la ni lo thung.

Vaccine duhkhawp sawrkarin a hmuh theih loh chungchangah hian Health Department lam chuan tih theih vak an nei lo tih National Health Mission a Mission Director Dr. Eric Zomawia chuan sawiin, "Sawrkar laipui leh damdawi siamtu company lam te ruahmanna siam angin damdawi hi kan dawng a, allocation an rawn siam zat ang bak tih ngaihna dang a awm lo," tiin ZALEN an hrilh. June thla chhung hian dose 18,180 leh dose 7,200 chu dawn tura an rawn ruahman sak tih a sawi a, tuna vaccine an pek pawh hi kum 45+ te dose tur atanga puk a nih thu an sawi. Department lam chuan kum 45 chunglam hi la tur an awm meuh tawh lo tiin, 80-85% zek pek a nih tawh thu an sawi a, sawrkar laipuiin 2nd dose lak hun kar 12-16 ah a rawn pawh sei avangin lo hman puk tur hi a awm phah tih an sawi bawk.

Cowin portal chungchanga social media lama thuthang chung-chang leh he portal-a luh a har chungchanga ZALEN zawhna chhangin Dr. Eric Zomawia chuan, “Priority group sawrkarin a siam mi leh sa an nih lem loh chuan induhsak theih dan vak a awm lo. Cowin portal hi zing dar 8:00-ah chat hawn thin a ni a, hemi a inziaklut tur hian kan inchuh a ni ber a, a vannei luh hmasak na a ni mai. Thawktu tan pawh booked lawk theih a ni lo. Induhsak dan pawh a awm lo,” a ti. 

Mi thenkhatten Covid-19 vaccine atana hman lar tak, Covishield chu a him tawk lo nia an sawi chungchangah State EPI Officer Dr. Lalzawmi chuan a him tawkah a ngai tih a sawi a. “Mizoramah pawh mi nuai 3 dawn hnenah Covishield vaccine hi kan pe tawh a, him lo ni sela chuan buai an awm tawh tur a ni a. Vawiin ni thlengin harsatna tawk kan la hre lo a, him lo ni se chuan sawrkar pawhin a chhawpchhuah kan ring lo a ni,” tiin ZALEN a hrilh. Kum 45 chin chung lamte tan chuan vaccine lak kawngah harsatna a awm lo niin State EPI Officer Dr. Lalzawmi chuan a sawi a, Adhaar card kengin vaccine pekna hmunah a lak theih reng tih a sawi bawk.