Bengaluru-a hmunpui nei Simple Energy chuan December 15, Zirtawpni khan an electric scooter thar Dot One chu an tlangzarh ta. He e-scooter hi Rs. 99,999 (ex-showroom) man a ni a, mah se hei hi Bengaluru huam chhungah bik a ni a, hmun danga a man tur chu January thla velah tihchian a ni ang. 

Dot One hi charge full-in km 151 tlan thei tura duan a ni a, keini tlangram angah erawh a danglam viau mai thei. A battery hi 3.7 kWh a ni a, a electric motor hi 8.5 kW a ni thung. Tihnun atanga second 2.77 chhung lekin darkar khata km 40 vela chaka tlan thei tura duan a ni. Simple Energy chuan Dot One hi rawng chi li - Azure Blue, Brazen Black, Grace White leh Namma Red te an chhawp chhuak a ni.

Tlangzarh rual hian booking hawn a ni a, January 2024 atangin an pe chuak tan dawn a ni. Simple Dot One hi touchscreen TFT dash a nih bakah, Bluetooth a awm tel bawk.