Aizawl: Assembly speaker Lalrinliana Sailo chuan, eiruk thubuaia Court in thiam loh a chantir leh jail tang tura a tih Dr. BD. Chakma, Tuichawng bialtu MLA chungchang chu dan lam thiam ten an la zirchian tur thu a sawi.

ZALEN zawhna chhangin assembly speaker chuan court-in Dr. BD. Chakma thiam loh a chantir chungchang chu official-in report an la dawng lo tih sawiin, dan lam thiam ten an la zirchiang dawn niin a sawi.

Hetihlai hian eiruk thubuaia kum khat tang tura court-in a chungthu a rel, Dr. BD. Chakma chuan court thutlukna chu Gauhati High Court, Aizawl Bench-ah khin let a tum thu tun hnaia thuthar thehdarhtute a kawmnaah a lo sawi tawh a, dan anga MLA atanga bân theih a nih chuan ban a inhuam thu leh, kum 2017-ah pawh minister atangin awlsam taka a lo bân tawh thu te, tunah pawh dan ang a nih chuan MLA atanga bân a ngam thu te leh harsatna a awm loh thu te a lo sawi tawh.

Rs. nuai 137 tih chingpen thubuaiah Special Court (PC Act) judge Vanlalenmawia chuan July 25, 2022 khan MLA Dr. BD. Chakma leh mi dang 12-te chu kum khat tang tur leh Rs. 10,000 theuh chawi turin a hrem a, bail-a chhuah lailawk nghal an ni.

Dr. BD. Chakma chuan Chakma Autonomous District Council (CADC)-a chief executive member (CEM) a nih laiin, hruaitu dangte nen inhriatthiam tawnnain Executive Secretary Digambar Chakma hnen atangin CADC-a thawkte hlawh leh hamthatna dang phuhruk nan development fund an hman puk thu sawiin, an mi mal hamthat nana hmang puk an nih loh thu leh an sum an hman puk chu an hlawh atanga an rulh thin thu te, October 19, 2017-ah Liabilities Clearance Certificate an dawn thute thuthar thehdarhtute a lo hrilh tawh bawk.