Tun hnaia Court in sum tih chingpen thubuaia thiam loh a chantir Tuichawng bialtu MLA Dr. BD Chakma chuan a thubuai chu Court sang zawk 'High Court' ah kalpui a tum tih a sawi.

Vawiin chhun dar 1 khan BJP Mizoram Pradesh office, Upper Republic veng ah chanchinbumite kawmin Dr. BD Chakma chuan Chakma Autonomous District Council a mawhphurhna an chelh chhungin an hlawh tur chu mipui mamawhna avangin an lo hmang puk niin a sawi a. Heng an sum hman puk te hi FIR thehluh anih hmain an rul leh vek nia sawiin hei hi he case chhuitu Investigating Officer pawhin a hriatpui niin a sawi bawk.

Dr. BD Chakma chuan MLA atanga chawlhtir chungchangah Speaker in dan leh hrai te thlir chungin uluk takin ngaihtuahna a sen a rin thu sawiin hetiang case ah hian Supreme Court thutlukna a loawm tawh nia sawiin kum 2 chin jail tang tura hrem te chu MLA atanga chawlhtir an ni ang tih a awm a. Amah chu kum 1 chauh hremna pek anih avangin MLA atanga chawlhtir anih a inrin loh thu sawiin MLA atangin chawlhtir pawh nise pawi a tih loh thu a sawi bawk.