Aizawl January 30, 2023: Mizo Hnam Run inkhawm vawina neiha thusawitu Lunglei South MLA Dr. K. Pachhunga chuan mau chungchangah CM Zoramthanga chu a advance avangin mipuiin an hriathiampui phak lo niin a sawi.

Mau chungchang sawiin Bamboo Development Board Vice Chairman Dr. K. Pachhunga chuan, "Kan pu hi a advance em em a, mipuiin kan hriatthiam pui phak thin lo,” a ti. Ram leilung hausaknate chu haichhuah chawp ngai a ni thin tih sawiin, “Mau hi chu kan chin ni miah lovin kan ramah a tam, hengte hi technology thiamna hmanga hman tangkai theih a ni. Mizoram maute hi Taiwan-ah te, India institute-ah te kan thawn a, mau chi tha vek an ni (a tha ber chu mautak a ni)," a ti bawk.

State sorkar chu Delhi atanga (fund) lo kal ang zela inrelbawl a nih thu sawiin Dr. K. Pachhunga chuan, “Heti laia duhthu kan sam ang ngawt hi a ni lo. Delhi phal tawka nung kan ni tih hi kan hriat a ngai. Vawiina sawrkar beitute hi sawkarah awm ve ta se, kan hotute ne pawh ek lo tur an ni. Keini chu time tested leader nei kan ni a, hatsatna tinreng paltlang tawh hruaitu nei kan ni,” a ti.

MNF Sawrkar chu sawrkar tha a ni tiin, "Tui lak, Gas leh buhfai supply bakah kawngpui tha kan nei. Tin, raltlan buaipui kawngah pawh sawrkar tha a ni," tiin, Kuhva chungchangah Lunglei South bialtu chuan, “Kuhva leh smuggling thawm lo ri fote hi sawrkar duh dan a ni bik lo, theihtawpa tanrual a ngai,” a ti.

MNF chu history ropui tak ziaktu leh ziak mektu a ni tiin, "MNF hi political party dangte aia danglam a ni a, Mizo history ropui tak a ziak teuh tawh a, a ziak mek zel a ni. Midang ten MNF an tluk lohna chu Kohhran thianghlimna hmaikawra hmang kan ni ve lova, Mizo hnam leh sakhua humhalh tura independence movement nena beitu kan ni,” a ti.