ZALEN April 28, 2025 : MNF Senior Vice President Dr. R. Lalthangliana chuan February ni 20, 2025 atangin Mizoram pumah loneitu chhungkaw 8820-te Sawhthing thar chhuah quintal 72460 (singsarih sanghnih zali sawmruk) lei sak tawh a ti a, sawrkarin Sawhthing a subsidise danah thil inthup a awm a rin thu a sawi.

Khawzawl District MNF V/C tling tharte chawimawina vawiina a hmanpuinaah Dr. Thangtea chuan Economic Survey 2024-25 tarlan dan sawiin, "Sawhthing chinna ram acre 40,550-ah a chingtu chhungkaw 25327-ten an chin zat chu 169,395 quintals a ni a. Quintal khatah quintal 7 vel thar tura chhutin, Quintal 11,85,765 vel Mizoramin thar tur anga ngaih a ni. "ZPM sawrkar hian an sawrkar hmain Cheng 50/- in a rate an siam sa a, tunah hian quintal nuai 10 chuang zet lei lohin a la awm," a ti.

Engtin nge an tih zel dawn? tih zawtin, "MNF sawrkar sum hnutchhiah cheng vbc 150 atangin cheng vbc 40 chu health care-ah an dah a, pawisa ba rulh nan an hmang a, cheng vbc 110 thlai thar lei nan kan dah an ti a. 'Sawrkarin kg khatah Cheng 30/- in kan subsidise sak dawn' an ti a. Heti zat subsidised-na hi thil inthup rapthlak tak, nakin lawka lang chhuak leh mai tur, sawhthing chingtute rawkna nasa tak a awm mai lawng maw," tiin sawrkar a zawt a ni.

MNF Senior Vice President chuan, "Tun hma kan kalphungah chuan rulling hian VC-ah 70,% 80% te an la thin a, tun sawrkar ZPM chuan majority an la thei tawk chauh a ni. Sinlung Hills Council bial 12 awmah bial 7 kan la a, hmun thenkhatah kan party a mi thoten min din thuah chung pawhin hneh takin kan la tling thei. Local Coun 85 vel awmah keini kha chuan kan la fai deuh vek a, tunah ZPM chu an tling tawk tawk chauh a, an hun reilote chhung hian sawrkar hnathawk leh mipui rin an hlawh tawh lo hle a ni," a ti bawk.

Khawzawl hmuna Matar 65 zet awmna 'Martar Thlanmual'-ah pangpar an dah nghal a ni.