Aizawl : Health & Family Welfare Minister Dr. R. Lalthangliana chuan Zampui tlang dung leh khawthlang lam kawt-chhuah - Kanhmun, Zawlnuam leh Kawrthah te a tlawh a, nimin khan Kanhmuna COVID-19 Screening Point tlawhin, duty te leh Kanhmun Local Task Force hotuten an lo dawngsawng a, Zawlnuam leh Kawrthah-a Healthdepartment hmun te a tlawh bawk

Health Minister chuan, “Kanhmun Screening Point ah hian chawhrualin ni tin mi 80 - 100 inkar an screen reng thin a, COVID-19 laka Mizoram him nan helai hmun hi a pawimawh em avangin emergency in a rem dan ang anga screening point hi hnawhsarum taka buatsaih a ni. COVID-19 hripui hian engtikah nge min kiansan dawn a hriat rih si lova, engemawchen chu screening point la dah a ngaih hmel avangin changtlung deuh zawka siam a tul a ni,” a ti. Thawktute nen sawihovin an mamawh an thlen te chu a rang thei ang bera bawhzui nghal a nih tur thu Minister hian a hrilhbawk.

Zawlnuam Primary Health Centre leh Kawrthah Community Health Centre pawh tlawhin an dinhmunte leh an mamawhte a zirchiang nghal a, hmalak theih nghal chi te chu a tul ang anga bawhzui a nih tur thu a sawi.

Health Minister Dr. R. Lalthangliana hian Zirtawpni atanga khan Zampui tlangdunga Zofate chenna khaw hrang hrang 11 - Zomuantlang, Phuldungsei, Sabual, Tlangsang, Banglazion, Behliangchhip, Vang-hmun, Tlaksih, Hmunpui, Hmawngchuan leh Vaisam a tlawhchhuak a, heng khaw hrang hrangah hian khawtlang hruaitute nen inkawmna hun an hmang. Minister chuan, “Zampui tlangdunga zofate chu kan unaute in nih avangin Mizoram sawrkar hian a enhrang dawn lo che u a, a thlahthlam dawn lo che u a ni. Khawvel ramri khamin min thenhrang mah se, kan thinlunga kan inunauna leh kan inlaichinna hi emgmahin a tichhhe thiang lova, kan tu leh fa, chhuan lo la kal tur zelte thlengin kan sawhngheh sauh sauh a tul a ni, tih sawiin, Mizo hnam a dinchhuah a a than duah hluah hluahna tur chuan khawvel hmun hrang hranga zofate hi kan tanrual reng a ngai a ni,” a ti.