Aizawl: ZPM Legislature Party hruaitu Lalduhoma chuan Local Task Force te hnenah sum lut a tlem nia sawiin Task Force te kuta sum lut zat hi langtlang taka kalpui an phut tih a sawi.

Nimina mipuite hnena thuchah a siamah Lalduhoma chuan Local Task Force ten sawrkar atanga sum an hmuh zawng zawng chu Rs. 4,42,38,000 a ni tawh niin a sawi a. Sawrkarin PPE a lei zingah hmantlak loh a tam hle tih sawiin PPE te hi middlemen vai sumdawng 2 kaltlanga lei a ni a ti a. "India ramah hian PPE siamtu sawrkarin a pawm leh licence nei 15 lai an awm a, Taiwan ram siamte pawh a tha hle tih hriat a ni. Chutih laia panic buying chhuanlam a, tender pawh ko lova heti zozai lei a ni hi pawmzam a har hle a. He thil hi CM ruahmanna hnuaia tih a nih thu tarlan a ni a. Hmantlak loh engzat nge awm, engnge a rate, tunge supplier tih te leh agreement copy te mipui hriata puang turin CM hi ka phut a ni," a ti a. ZMP Legislator ten sum hman dan hi uluk takin an chhui zel dawn niin a sawi.

Lalduhoma chuan, “Mizoram House awm ve lohna hmuna tangkhangte mangang authawm hriat tur a la awm reng a. Ni 100 inhlawhna leh thildang engmah dawng ve lo te, Ration Card pawh neilo te, lirthei hmanga eizawng te, mi in leh dawr luahtute thawhchhuah nei tawh silo te tam tak an awm a,”.

“Lei tur pawh awm se leina tur neilo kan pung tual tual dawn. Hengho tan hian rang taka ruahmanna siam vat a ngai a. Kan sumdawng liante leh Association te hi kohkhawm a, Stock an neih zat te hriata, ka mamawh chi hrang hrangte lakluh dan tur Road map siam vat a ngai a ni,” ­­­tih a sawi bawk.