Aizawl: MNF party MLA 12-ten ZPM Legislature Party (ZLP) leader Lalduhoma dan bawhchhiaa puha MLA atanga bân tura Assembly Speaker Lalrinliana Sailo an ngen chungchangah thutlukna puan hun tur sawi theih a la ni lo a, hemi chungchangah hian Speaker Lalrinliana Sailo chuan theihtawp a dan en a nih tur thu a sawi.

ZALEN palai zawhna chhangin speaker chuan an hriat theih ang tawk dan en chungin fimkhur takin hma an la tih sawiin, an hmanhmawh loh thu a sawi. “Duhsak bik awm loin hma kan la a, Pu Duhoma rawn insawifiahna chu complaint-tu MNF lamah kan pe a, an rawn chhanna pawh Pu Duhoma kan pe ve leh ang,” tiin, “Thuhruk awm loin kan hrilh tawn vek a, hei hi an rawn sawi dan che a ni kan ti tawn tawn mai,” speaker chuan a ti bawk.

Lalrinliana Sailo chuan Duhoma hek a nih chungchang a thutlukna awm theih hun tur chu a la sawi theih loh tih ZALEN hrilhin, bân a nihna tur chance a san zawk leh san zawk loh tur pawh sawi theih a la awm loh thu a sawi. “Theihtawpin dan kan en ang chu,” a ti.

Speaker hnena hek a nih chungchangah ZLP leader Lalduhoma chuan thutlukna siam tur-ah rin dan sa engmah a neih loh thu ZALEN palai hrilhin, speaker thutlukna siam tur a nih thu leh speaker thu thu a ni tih a sawi. ZPM thlan tlin an nih thu leh amah phei chu ZPM Chief Ministerial candidate lai a nih thu sawi bawkin, “Ani hi a ZPM em mai in tiha inbân tum hi a mak ve bawk em a ni,” tiin, “Nangmah thlantlingtu che hi phatsan rawh min ti nge ni zawk ni, MNF lam hian dan min bawhchiattir an tum zawk ka hre lo,” a ti bawk.