August 22, 2022 : Vawiin Hnam Run chhung inkhawmah MNF Treasurer K. Vanlalauva chuan thu a sawi a, he hunah hian MNF General Headquarter President atanga Laldenga paih a nih dan leh lakluh a nih leh dan bakah MNF official nomination a tel lo chunga Zoramthanga MNF president a nih leh dan te, Lalduhoma chu Bhawan lilam a tum thu sawitu a nih thu te a sawi.

K. Vallauva chuan Zoramthanga chu MNF siamthatu a nih thu a sawi a, MNF dinhmun chhiat lai ber pawha lungrualna thlentu a ni a, remna atana a thawhhlawk hle a ni a ti a, a hmalak dang hrang hrang te a tarlang. Laldenga remna siam tura Delhi-a chahluh a nih dan leh London-a dah kir a ni dan te a sawi bawk. Tuna inremna thuthlung zawng zawng hi Aizawl lama political leader te rawtna te, MNF Hqrs captital lam rawtna te a ni a,  tichuan inremna tha tak a lo chhuak ta a ni.

Kum 1997-ah MNF-in party chhung inthlan a hmachhawn dan chungchang sawiin, NEM 170 chuang ten Nomination 7 am siamah Zoramthanga chu official nomination-ah a tling lo, hemi tum hian 'MNF President ka nih chuan bial pek intiam an lo awm ru a, Pu Zoramthanga chuan official candidate a chang pha ta lo a ni," a ti. Mahse, MNF constitution-ah ‘MNF party member tu pawh Floor candidate a ni thei ang’ tih a ni a, chumi hmang chuan Pu Zoramthanga chu vawrhchhuah a ni, a ti.

Vote thlak hma ni chiahah Pu Duhoma chu TV lamin “MNF Bulldozer tih hial i ni a. MNF President lo ni ta la, Congress hi engtinnge i beih ang?” tiin an zawt a. “Congress chu beih tham an ni lova, kan pawngsual mai mai ang a, kan pawngsual hnuah Bhavan ka lilam ang,” tiin a chhang a. Zawhna pahnihna atan, "Lo tling lo palh ta la, engtinnge niang le?" tih an zawt a. "A tling apiang chu lawm takin ka pawm ang’ tiin a chhang a. ‘MNF hian hming thlak duhna deuh in nei em, sawirik a va awm ve?’ tih an zawt leh a, ‘Mizo hnam awmchhung chu MNF hi a awm ang, a hmingah hian kan buai lo va, thlak kan tum lo,' tiin a chhang leh," a ti. 

K. Auva chuan, "Pathian hian he hnam leh party hi a hmangaih em a, Vote chhiar a nih hnuah Pu Zoramthanga chu hneh takin a tling ta a ni. Chu chuan Rinawmna leh rinawm lohna hlimthla a tarlang a ni. Jakoba’n a thih hmain a fate a kokhawm a, a upa ber Reuben-a chu a chhipah pawh kut nghat loin, ‘nang hi ka fa tir, ka thiltihtheihna, ka chakna rah hmasaber i ni; San berna leh thuneih berna chu i ta a ni. Nimahsela, tui anga nghet lo i ni, chungnun berna chu i nei lo vang,’ a ti a. Hei hi politics-ah pawh a dik a, tui anga nghet lote hian malsawmna an dawng ngai lo," tiin, "Kan hotuten an ruat hi lawm takin pawm ila. Mi nghet, mi rinawm ni turin party mite i in buatsaih ang u’ a ti.