India hmarchhak state paruk aiawha India rama cricket inelna sang, Duleep Trophy khel tur, Ramhlun Venglai Cricket Club batsman Joseph Lalthankhuma chuan a tum ang ngeia Mizo zinga he intihsiakna khel hmasa ber nih a tumna kawngah kawng dik a zawh zel.

Board of Control for Cricket in India (BCCI)-in India rama cricket inelna ngaihhlut hlawh a buatsaihah hian India ram pum chu zone rukah thenin Mizo tlangval, Joseph-a hi North East Zone aiawha khel tur mi 15 (stand by player pakhat nen 16) thlan chhuah zingah a tel a, Nagaland-a inbuatsaihna neia an chawlhkar hnih dawn an camp hnuah Pathianni chawhnu khan an khelhna hmun tur, Karnataka khawpui, Bengaluru an thleng.

Nilaini atang hian M.Chinnaswamy Stadium-ah North Zone nen an inkhel dawn a, zone huphurhawm ber pawl hmachhawn tur ni mah se Mizo tlangval a zam lem lo va, inbuatsaihna an neih lai pawhin harsatna lian a tawk lo tih ZALEN a hrilh.

Kum 22 mi, Joseph-a telna team hian inbuatsaih nan Ningani leh Inrinni inkar khan Sovima Cricket Stadium, Sovima, Chümoukedima district, Nagaland-a North East Team B nen an inkhelh tum pawhin batsman-ah chuan a che tha ber niin thawh (innings) hnihah run 60 a siam.

Inbuatsaihna an neih chhungin Joseph-a hian harsatna lian a nei hran lo niin a sawi a. A luh thinna erawh an sawnsak a; mahse, ‘team-in min mamawhna apiangah theihtawp ka chhuah zel ang’ titu Mizo tlangval hi a chet chhiat phah lem lo.

Middle order batsman ni mah se Joseph-a hi North East Zone B an hmachhawn tum hian vaw hmasatu pahnih (opening batsman) atan an hmang a, hei hi amah pawhin a cho vang a ni.

“Match simulation (practice-na chi khat) kan neih vawi khatnaah ka luhna thin, middle order-ah min luhtir a, an lawm deuh nge ni, coach leh captain ten min ko hrang a, ‘Open slot hi tunah chuan a awl a, inchuh ber spot a ni a, i open ngam em?’ min ti a. ‘Ok sir, I’ll try my best at any position if the team needs,’ ka ti,” a ti.

“Match simulation vawi hnihnaah chuan min open-tir chhin a, ball hnihna lekah ka out a; mahse, chance min pe leh a, kan bat theih thleng kha out lovin ka bat ta a ni,” tiin opener atan an sawn dan a sawi.

Bengaluru khawpui pana an chhuah hmaa inbuatsaihna inkhel hnuhnungah pawh opener atan an hmang zui ta a. Hmarchhak aiawh tura an thlan hlim atanga Mizo zinga Duleep Trophy khel hmasa ber nih a tumna kawngah a ke pen a la dik zel rih a ni.

Duleep Trophy-ah hian kum hmasa lamah pawh khel tura Mizo thlan an lo awm tawh a; mahse, inkhel tak takah erawh an inlan phak lo va, dingkhawr Joseph-a hian a hmasa ber nih a tum hle.

Camp zawma Nagaland a thlen hlima ZALEN-in a biaknaah pawh, “Ka tel a ni tih ka hriat tirha ka rilrua lo awm nghal chu, ‘Squad tikimtu mai ni lovin, Mizo zingah khel hmasa ber nih ka tum ve tlat a ni,’” tiin a sawi tawh a ni.

An hmachhawn tur, North Zone hi zone paruk zinga tha ber pawl an ni a, “A hminghmerha en chuan India tual chhung inelna leh khawvel huap (international) thlenga khel tawhte an ni a; mahse, game a nia, engmah a hriat loh,” tiin an hmachhawn dawn tih an hriat tirh pawhin Mizo cricketer hian a sawi.

North Zone hi Duleep Trophy-a zone hlawhtling ber niin huphurhawm tham an ni a. Ranji Trophy khel thin team pasarih - Delhi, Haryana, Himachal Pradesh, Jammu & Kashmir, Punjab leh Services atanga thlan chhuah an ni a. Vawi 17 zet Duleep Trophy la tawhin champion ngun ber an ni a, 1990-91 leh 1994-95 chhung a zawna vawi nga champion niin champion zawn rei thei ber an ni bawk.

Tun tuma hmarchhak aiawh tura thlan zingah Joseph-a chiah hi Mizo a ni a. Manipur chu thawh hnem berin panga an thawh a, Meghalaya leh Nagaland-in pathum ve ve, Sikkim-in pahnih leh Arunchal Pradesh leh Mizoram atangin pakhat ve ve thlan an ni a. Hmarchhak state zinga mi, Assam leh Tripura chu East Zone huangah an tel thung.

Inelna an hmachhawn turah hian chak lo an tla nghal zel dawn a, Test Match anga khelh tur niin team khatin innings hnih zel an nei a, ni li chhung (international Test Match-ah ni nga) an khel dawn a, Joseph-a te hi Nilaini atanga inkhel tanin Inrinniah an zo dawn tihna a ni.

North East Zone hian North Zone hi an hneh chuan July 5-8, 2023 chhungin M.Chinnaswamy Stadium-ah tho, South Zone hmachhawnin semifinal an khel leh ang.

NORTH EAST ZONE SQUAD:
Jonathan Rongsen (Nagaland), Captain
Nilesh Lamichaney (Sikkim), Vice captain
Kishan Lyngdoh (Meghalaya)
A.R.Ahlawat (Arunachal Pradesh)
Joseph Lalthankhuma (Mizoram)
Prafulamani (Manipur)
Dippu Sangma (Meghalaya)
Jotin Pheiroijam (Manipur)
Imliwati Lemtur (Nagaland)
Palzor Tamang (Sikkim)
Kishan Sinha (Manipur)
Akash Kumar Choudhary (Meghalaya)
Rajkumar Rex Singh (Manipur)
Nagaho Choshi (Nagaland)