Aizawl: November 2, 2020 atang khan Aizawl khawpui bawlhhlawh paihna hmun thar, Solid Waste Management Centre, Tuirial-ah Aizawl khawpui bawlhhlawhte paih tan a ni a. SWMC-a bawlhhlawh paih a ni chu lawmawm an tih thu sawiin a hmaa bawlhhlawh paihna thin dumping centre chu an hmelma number 1 a ni tih Tuirial Airfield VCP Lalthangluaia chuan Zalen a hrilh.

Solid Waste Management Centre, Tuirial hi tun hnai khan Zalen chuan a tlawh a, he hmun enkawltu, SIPMIU thawktuten an hmalakna hrang hrangte an lo hrilhfiah. SIPMIU thawktute chuan tun dinhmunah SWMC-ah hian ni tin bawlhhlawh metric ton 70 atanga 80 inkar paih thin a ni tih an sawi a.

Bawlhhlawhte hi thliarin a tawih thei lo leh tawih theiah te thliar a ni a, a tawih thei hi leitha siamna atan hmangin a tawih thei lo hi an thlir leh hnuah a theih chen chen chu sumah an chantir niin an sawi.

Plastic bawlhhlawhte chu chi 7-ah thliar lehin bottle leh thil dang dangte chu sumah an chantir a, sarang lam chi chu kg-ah duli leh Re. 1-in an hralh a, cement company bakah company dangten an lei thin a, RDF fuel atan an hmang niin an sawi a.

Covid-19 hri len hma chuan bawlhhlawh tawih thei lo hi kar khatah truck trip 1 atanga trip 3 te an hralh a; mahse, Covid-19 hri len hnuah chuan inkalpawhna a buaithlak avangin an hralh tawh lo va, hei vang hian bawlhhlawh pawh a tam phah niin an sawi.

Bawlhhlawh tawih theite hi kar 3 an dah hnuah mechanical compost plant-ah la lutin leitha atan an siam leh a. Khawl hmang hian leitha pawh eng emaw zat an siam tawh a; mahse, certificate an la neih loh avangin an la hralh chhuak lo tih sawiin tunah hian an leitha siam chu AES Laboratory, New Delhi-ah an thawn mek a. He laboratory hian test an nei mek a, result a that chuan mipui lei theiha hralh an tum. SWMC ah hian changpat hmanga leitha siamna tur hmun vermi building pawh siam a ni a; mahse, a senso a san deuh avang leh mechanical compost hian a la zawh tho avangin he hmunah hi chuan leitha an la siam lo niin SIPMIU thawktute chuan he hmun tlawhtu Zalen an hrilh.

SWMC ah hian bawlhhlawh hman tlak tawh loh phumna hmun tur Engineered Sanitary Landfill pawh siam a niin he hmunah hian suma chantir theih loh bawlhhlawh tawih thei lo te chu phum tur a ni a, he khurah hian nitin bawlhhlawh metric ton 44 paihin kum 5 chhung daih tura ruahman a ni a. Mahse bawlhhlawh te hi thliar hran mek an niin sum a chantir an nih thin avangin helai hmunah hian bawlhhlawh phum tura paih tur a la awm hrilh lo a. Tun ang zela an kal chuan landfill hian kum 5 aia tam a daih thei dawn niin SIPMIU thawktu te chuan an sawi.

Solid Waste Management Centre ah hian hnim hnah leh insakna bungrua te paih phal a ni lo a, bawlhhlawh paih motor ten paih an phal loh avangin mipui ten harsatna an tawk nasa hle a. hemi chungchang hi sawifiahin SIPMIU thawktu te chuan SWMC ah chuan domestic waste chauh paih theih a ni tiin thing bung, hnimhnah, leivung te chu Aizawl Municipal Corporation in a paihna hmun tura a ruahman ah chauh paih theih a ni tih an sawi a. Bawlhhlawh tawih thei lo zinga lehkha (paper) chhiar tel anih chungchangah paper hrim hrim chu a tawih thei nia sawiin mahse paper ah hian lehkha tui a kai chuan chemical a awm avangin leitha siamna atan a tha lo niin an sawi a. Hei bakah hian paper thenkhatah chuan lining na a awm thin nia sawiin sum a chantir theih chu an duh dan ber a ni a, sum a chantir chuan bawlhhlawh pawh a tlem zawk dawn niin an sawi. SWMC ah hian khawl thil lam pang electronic waste paih phal a ni lo e-waste hi chu AMC in a piahna tur bik a ruahman, Riangvai thlanmual bulah paih tur a ni thung.

Solid Waste Management Centre hi December ni 11,2019 khan hawn a niin bawlhhlawh paih tur te tan zing dar 8 atanga tlai dar 5 thleng hawn thin a ni a, laklawh bikah chuan an paih phal thin a ni. Tun dinhmunah SWMC ah thian thawktu mi 55 an awm mek. SWMC hi contractor hi kum 2 a enkawl hnuah thuneitute hnenah hlan turin inremna siam a ni a, mahse contractor in a thawh that loh avangin ban a ni a, SIPMIU kutah hlan a ni a. Ruahman dan chuan December ni 11,2021 ah AMC kuta hlan tura tih a ni.

Tuirial airfield khawtlang chuan bawlhhlawh paihna hmun thar Solid Waste Management Centre a bawlhhlawh te paih a ni ta chu lawmawm an tih thu sawiin bawlhhlawh paihna hmun hlui dumping centre-ah bawlhhlawh paih an awm palh thulhah November ni 2,2020 (Thawhtanni) atan khan duty an insiam a, bawlhhlawh paih thin te chuan a hmun hluiah hian an paih ngai tawh lo niin an sawi. Tuirial airfield VCP Lalthangluaia chuan, "Dumping centre-ah hian bawlhhlawh paih ho ni lo, veng bil motor hire a pih thin leh damdawi in hnawm paih ten an bawlhhlawh an paih kan hlauh avangin duty kan insiam a. Bawlhhlawh paihna hmun thara paih tur a ni tih la hre lo leh lokal laklawh mi tlem te chu kan paih tir a, kan ngenna te an zawm avangin kan lawm hle a ni," tiin Zalen a hrilh. Dumping centre chu an vengin an tuar hle nia sawiin, "Kan tan chuan kan hmelma number 1 a ni a. Lui hmanga kan eizawnna a tawp a, a khu avang hian kan hrisel loh phah a. A hmaa kum 2/3 mitthi nei lo thin kha kum 1 ah lu 10 te kan hloh a, asthma natna nei te kan tam phah a. Helai bawlhhlawh paihna in kan hriselna a nghawng dan hi survey kan nei mek a ni," a ti bawk.

Aizawl Solid Waste Management Centre hi State Investment Programme Management and Implementation Unit (SIPMIU), Aizawlin North East Capital Cities Development Implementation Programme (NERCCDIP) hnuaia an siam a ni a. Aizawl khawpui bawlhhlawh paihna tur hmun siam thar, Aizawl Solid Waste Management Centre, Tuirial chu Dec.11,2019 khan UDPA department changtu deputy chief minister Tawnluia'n a hawng. Bawlhhlawh tawih thei lo, hman nawn theih leh hralh leh theih turte thliar hranna hmun Waste Resource Centre bun a ni a, chu chuan ni khatah kg. 74,000 a khawih thei dawn. Bawlhhlawh tangkaina nei tawh lote phum bona tur, Sanitary Landfill Centre siam a ni bawk a, ni khatah kg. 44,000 paih theihna tura duan niin, kum nga daih tura siam a ni.

SIPMIU chhinchhiah danin bawlhhlawh paihna hmun thar, SWMC-a Aizawl khawpui bawlhhlawhte paih vek a nih hnua bawlhhlawh paih dan chu November ni 2-ah ton 84.35, ni 3-ah ton 76.38, ni 4-ah ton 52.36 leh ni 5-ah 55.27, ni 6-ah ton 54.76 a ni a. SWM Centre Airfield Venga mi hian ni tin ton 190 bawlhhlawh a sawngbawl thei a, tun dinhmunah chuan kan bawlhhlawhte hi awlsam takin sawngbawl theih a ni dawn niin SIPMIU chuan an ngai. February 2020 atanga October 2020 thlenga SWMC a bawlhhlawh dawn te hi Dry Waste ni tin ton 6.46, Wet Waste ni tin ton 4.83 niin chawhrualin ni tin bawlhhlawh 11.29 Tons paih anga chhut a ni.