ZALEN November 4, 2024 : Dy. CM hlui Chief Minister Tawnluia chuan, Aizawl khawpui laili atanga Assam Rifle sawnchhuahna chungchanga hmalakna hmasa te chu MNF sawrkar hnuaia kalpui a nih thu leh AR Biak In hmun chu an party office hmun atana sawihmuh an ni tawh a ti a, Laldenga'n Biak In hmun luahlan chu an duh loh thu a sawi a, hnam himna atan sawrkar puih an inhuam reng thu a sawi bawk.

Vawiina Mizo Hnam Run-a chhung inkhawmna neihah Tawna chuan, "AR sawnchhuah hi Pu Laldenga, a hun leh tha zawng zawng kan ram tana hmang zotu sulhnu pakhat zinga pawimawh a ni. Kum 1952 khan Aizawl DC, Lushai Hills S. Bartakati-a'n Assam Rifle Standing Order No.II of 1952 a siam a, chu chu Assam Gazzette ah ni 8.8.1952 ah chhuah a ni. Chutah chuan Khatla-a AR te awmna hi an thingtuah lakna atan chauha pek an ni a, land ownership pek tel an nilo a, an tidanglam thiang lo a, an hmanloh chuan sawrkarah an pe let leh tur a ni," a ti.

Tawnluia chuan, "Kum 1986 a remna thuthlung ziah a nih khan Pu Denga ngaihpawimawh hmasak ber zinga mi chu AR sawnchhuah a ni. Zokhawsang-a AR ram tura kan pek pawh Pu Denga CM lai, Revenue Minister ka nihlai a ni a, a tirah kan leng lo e, tiin an rawn report-a, survey neih nawn leh niin, mimal ram te dilin cheng vaibelchhe 92 lai compensate ah sen phah a ni. Tichuan a ram zau zawng chu 1296 acre niin ni 31 May, 1988-ah Zokhawsang a an awmna tur hi tihfel sak an ni a, AR sawnchhuahna tura hmalatu chu Pu Laldenga a ni," a ti bawk.

Tawna chuan AR Biak In hmun chungchang sawiin, "Tuna Chief Minister-in MOU draft lo awm tawhah AR neih hlen tur anga a sawi kha thu diklo a ni. AR lamin draft rawn siam mah se, kan pawmpuilo. Kan sawrkarah khan Quarter Guard leh Loch House te pawh hi Mizoram sawrkarah an hlan ngei ngei tur a ni tih kha kan thu hnuhnung a ni. Tin, Biak In hi Zokhawsanga an insawn hunah Church Building leh a compound te hi Mizoram Synod hnenah hlan a ni ang, tih a nih angin kum 1987-ah kan pe a ni, a ti a, Pu Denga hunah khan kan party office turin tuna Aizawl Dak Inpui te leh AR Biak In hi min kawhhmuh a, Pu Denga erawh chuan kohhran Biak In hi kan khawih thiang lo a ni, a ti. AR Biak In hi kan chhuhsak lo a, kan lo humhalh sak zawk a ni, tih hi zoram mipui hriatah ka sawi duh a ni," a ti bawk.

Tawna chuan, "AR sawnchhuah hi hnam issue a nih avangin chhuak ngei se kan duh a, tuna kan sawrkar nena agreement an siam erawh hnam tana himlo tam tak awmthei niin a lang thung. Hnam himna tura puih an ngaihnaah pui kan inhuam reng a, a hmun erawh joint verification an neih hma chuan khawihchet nilo sela a tha hle in ka hria," a ti bawk.

Tawna chuan Zokhawsang a AR hmun chungchang sawiin, "Kum 1988-a President Rule-ah kan luh leh tak avangin sawlai ram saw a thing ta thuap mai a. Kum 1998 kan sawrkar leh khan kan CM hnenah, 'Camp sakna tur min dil chhuahpui rawh' tiin an ngen leh a, tichuan tuna an camp sakna tur saw kan President hian Vbc. 145 chuang a nawr chhuahsak a ni." Tawna chuan, kum 2006 khan Land Lease-in Mizoram sawrkarin AR hnenah kum 99 chhung an awmna turin mumal taka tihfel a ni a, Tui, Eng leh Kawngpui an insawnna tura an mamawh ang chu an pe vek a ni, a ti bawk.

Tawnluia chuan, "Kum 2002 ah khan AR chhuahsan tur ram awl hi vangtlang (public purpose) ah hman ni rawh se, tih hi dan kan siam a, Legislation-ah kan passed bawk a ni. AR lam pawhin kan insawn dawn chuan tih tihfel ni rawh se, an tih zawng zawng pawh tihfel vek a ni," a ti bawk.

Dy. CM hlui chuan, "MNF chuan Pu Denga hun atang tawhin 'AR hian an ram luahte hi avaiin an chhuahsan tur a ni, tih hi kan dinna nghet tak a ni, AR sawnchhuahna tur chungchanga lehkha pawimawh leh hmalakna awm zawng zawng hi kan tih vek a ni, kan hmalaknate kha chhui theihin a awm vek a ni. AR sawnchhuah chungchangah hian MNF party hian Gen. Assembly, kum 1988-ah khan a lo pass hial tawh a, an hmun hlui pawh Vantlang/Mipui tan hman ni rawh se, tih thlengin kan lo pass tawh a ni," a ti bawk.