Aizawl: Deputy Chief Minister Tawnluia chuan Zirtawp zan khan Vanapa Hall-ah Central YMA buatsaih kumpuan 'Zirna Uar' infuih tharna programme a hmanpui a, kumpuan hlawhtlinna tur atana CYMA lehkhabu buatsaih 'Kailawn' tih chu a tlangzarh nghal.

Deputy Chief Minister Tawnluia chuan kum 2019-21 chhung Kumpuan atana YMA in 'Zirna Uar' an puang chu thil lawmawm tak nia a hriat thu sawiin kumpuan hlawhtlinna atana hrileng karah pawh YMA Branch hrang hrang ten tha thlah loa hma an lakna te leh Branch tam tak in zirlai harsa ten zirna an chhunzawm ve theihna atan zirlai harsa te chhawmdawl hna nasa taka an thawk chu ropui a tih thu a sawi.

Deputy Chief Minister chuan sawrkar chuan zirna lamah hmasawnna chu a ngaipawimawh hle tih sawiin Chief Minister leh Education Minister te hmalakna in zirtirtu in daih lo lutuk phuhruk nan kum hnih chhungin zirtirtu 1600 zet lak an nih thu te, Hindi Teacher pawh 540 lak an nih thu te a tarlang a. "Sawrkarin National Education Policy zirchiang tura a din Study Group leh Expert Committee ten he thil hi an zirchian mek a, kan hnam leh sakhua mil a NEP ah kan sengluh leh kan hman (adopt) theih dan tur an zir chiang mek a a ni," a ti bawk. Deputy Chief Minister hian CYMA buatsaih, Mizo mithiam hrang hrang mi 12 te thuziak zirlaite fuih leh kaihruaitu thei tur thu tangkai tak tak dah khawm lehkhabu 'Kailawn' tih chu a tlangzarh bawk a. A bial chhunga YMA Branch hrang hrang te sem turin bu 100 a lei a, programme senso atan cheng 20,000 CYMA a pe bawk a ni.